Сюргюнликтен эвель Къырымда яшагъан ве гъурбет якъларгъа гузель Ватан
акъкъында хатырлавларны алып кеткен семетдешлеримиз олгъандже, тувгъан
топрагъымызнынъ тарихы джанлы оладжакъ. Бойле къартларымыздан бири –
докъсан эки яшындаки Нури агъа Эмирвелиев. Шимди о Къурман къасабасында
яшай, догъма исе отузлыдыр. Не къадар йыл кечсе де, Нури агъа озь кучук
Ватанынынъ эр бир кошесини хатырлай ве бу мевзугъа багъышлангъан китапны да
нешир этти.
Гузель донатылгъан софра огюнде Нури агъа озь мусафирлерни къаршылай. Олар
арасында олмакъ бизим муарририетимизге де къысмет олды. «Энди джума намазыны
къылдым», – деп айтты Нури агъа. Яшына бакъмадан, о ич бир джума намазыны
къалдырмай. Джамиге барып оламаса да, эп бир эвде, къорантанен берабер намаз
къылмагъа унутмай.
«Ана тарафым 14-нджи асырдан келе. Иса деде – пельван олгъан. Баба тарафым
акъкъында малюматларны 15-16 асырдан башлап топладым. Бабам Иса огълу Эмирвели
эди. Меним сойадым да башта Исаев эди, сонъра исе анам Эмирвелиев сойадына
денъиштирди. Ойле керек олды, иште. Дженктен эвель Отузнынъ этрафыны яхшы биле
эдим. Отузынджы сенелери анда 10-11 маале бар эди. Отузнынъ ады исе таа 12-нджи
асырнынъ весикъаларда бар эди», – деп тариф эте Нури Эмирвелиев.
Сюргюнлик вакътында Нури агъанынъ анасы Атидже Эмирвелиева (1912 с. догъды)
кендже огълусы иле яшай эди. Амма олар догъмушлары иле – къартанасы Мусемма
Мусаева (1872 с.), келинлери Айше Мусаева (1920 с.), битасы Музине Мусаева (1939 с.) ве
битасынынъ огълу Таир Мусаевнен (1940 с.) бирлешип, берабер яшамакъ къолай олсун
деп, куньлерини кечире эдилер.
«Сюргюнлик вакътында къорантамыз Судакъ районынынъ Отуз коюнде яшай эди. Учь
одалыкъ эвде яшай эдик, азбарда мувакъкъат сарайы ве айванлар ичюн ахыр бар эди. Бир
участкамызда мейва тереклери бар эди: шефтали, эрик, армут ве балабан беяз дут. Бундан
гъайры, сыгъыр, эчки, тавукъларны бакътыкъ. Мен экинджи сыныфта окъудым.1941
сенеси бабам Эмирвели Исаев (1905 сенеси догъды) ве эмджем Сеитмамут Мусаев (1912
с. догъды) Къызыл Ордугъа ве джебеге алындылар. Къырымда шаркъий орманларнында
тизем Медине Сейдалиева (Велиева) партизан отрядында иштирак этти», – хатырлай Нури
агъа.
Продолжение читайте в Мераба № 39 (457)