Материал посвящен 91-летию со дня рождения известного крымскотатарского певца, народного артиста Узбекской ССР Февзи Билялова.
Эфсаневий инсан, къырымтатар халкъынынъ гъуруры, ватанынынъ садыкъ огълу Февзи Билялов сагъ олса эди, бу куньлери 91-йыллыгъыны къайд этер эди. Аятыны санаткъа багъышлагъан белли йырджымызны Ташкент ве Самаркъанд, Фергъана, Бухара ве Наманган, сонъра исе бутюн Советлер Бирлигининъ концерт залларында алгъышладылар. Февзи Биляловнынъ 91 йыллыгъына багъышлангъан махсус саифемизни такъдим этемиз.
Омюр ёлу
Февзи Билялов 1932 сенеси август 18 куню, весикъаларгъа коре, 1936 сенеси декабрь 30 куню Акъяр шеэринде дюньягъа кельди. Онынъ бабасы Муждаба та дженктен эвель кой шурасынынъ башы олгъан. Дженк башлангъанынен джебеге кетти. 1944 сенеси сюргюнлик нетиджесинде Февзи Билялов озь аилесинен Озьбекистаннынъ Самаркъанд шеэрине тюшти. Мында еди йыллыкъ мектепни битирип, техникумгъа кирди. 1956 сенеси окъувны кой ходжалыгъы институтында девам этти.
О заманда истидатлы яш Февзи акъкъында белли бестекярымыз Ильяс Бахшиш бильди. Институткъа келип, Февзи Биляловны тапа ве Эстрада театросында отькерильген ярышта иштирак этмеге давет эте. Февзи Билялов бу ярышта «Язгъа чыкъсам, эв салсам» йырыны ве дигерлерини иджра этти. Ярышны мувафакъиетнен кечти ве ансамбльге солист оларакъ къабул олунды.
Мартнынъ 12- де «Хайтарма» къырымтатар оюн ве йыр ансамбли Атабаев мудирининъ эмиринен Озьбекистаннынъ Эстрада театрининъ теркибине кирди. Бойлеликнен, Февзи Билялов миллий ансамблинде чалышмагъа башлады
. «Хайтарма» ансамблинде чалышмакънен бирге Февзи бей Ташкенттеки А. Н. Островский адына театр институтынынъ режиссёрлыкъ кафедрасында окъуды. 1970-джи сенелернинъ башында Февзи Билялов джиддий шекильде фольклорнен огърашып башлады, чокъ билинмеген йырларны эсли-башлы, къырымлы бестекяр ве иджраджылардан язып алды ве огренди. Бойлеликнен, «Къара тавшан», «Бир омуздан бир омузгъа сачлары» киби унутылаяткъан эски йырлар джанландырылды. 1970 сенеси белли йырджымыз «Хайтарма» ансамблининъ бедий ребери ве солисти олды.
Февзи Билялов озь аджайип ве мефтюн этиджи сеси иле чокъ инсанларны айретте къалдырып, халкъымызнынъ севгисини къазанды. Онынъ сеси, тек онъа хас олгъан услюби, халкъ арасында пек севильди. Биляловнынъ иджрасында халкъ тюркюлеримиз – «Байдарава ёллары», «Салгъыр бою», «Ягъма ягъмур» ве иляхре миллетимизге рух берди. 1974 сенеси «Озьбекистан халкъ артисти» унванына наиль олды. «Хайтарма»нынъ концертлеринде заллар эр вакъыт толу эди, атта билетлер тапылмай эди.
Продолжение в газете «Мераба» № 33 (399)