Материал о молодой художнице Султание Усеновой
Мимарлыкъкъа окъугъан яш рессам Султание Усенова тасвирий санат онъа кендини ифаде этмеге ярдым эткен екяне васта олгъаныны бильдире. Къыз ресим япкъанда озь дюньясына далып, рессамлыкъны шифа берген бир санат, деп сая.
Султание балалыгъындан тасвирий санатнынъ инджеликлерини озь башына огренген. Юкъары сыныфларда исе бу санат боюнджа дерслерни тасвирий санатнынъ усталарындан алып башлагъан.
– Рессамлыкъ тёгерегине он яшына къадар балалар къатнай эди, лякин устазым манъа да рессамлыкънынъ инджеликлерини огретип олды. Ондан гъайры бу яз тасвирий санатнынъ сырларыны манъа истидатлы рессам Осман Бейтуллаев ачты, – деп пайлаша къыз.
Иджатчы тасвирий санаткъа кунь-куньден мефтюн олгъаныны сёйлей, чюнки меарети арткъан сайын ички дюньямыз, дуйгъуларымыз, къайгъы ве къасеветлеримизни не къадар там акс эттирмек мумкюнлигини анълай. Факъат Султание зюни рессам деп саймай.
– Рессам олмакъ ичюн даа чокъ йыллар чалышып, буюк теджрибе арттырмакъ керек. Мен исе иджадий ёлумнынъ тек башында турам, — дей Султание.
Бугуньде Султание Багъчасарайдаки къуруджылыкъ, мимарлыкъ ве дизайн колледжининъ сонъки курсында окъуй. Къыз мимарлыкънен пек меракълана ве рессамлыкъ бу саанен пек якъын олгъаныны айта.
– Мимарлыкъны пек севгеним киби, тасвирий санатны да шай севем. Фикиримдже, экисини бириктирип, буюк зевкъ алмакъ мумкюндир.
Къуруджылыкъ факультетинде окъугъаным ичюн, эр йыл ишимни къорчалагъанда футболкамда курс ишимнинъ лейхасыны тасвир этип келем. Бойлеликнен, бу джиддий зенаат да бир санат олгъаныны косьтермеге тырышам. Иджат этрафымыздадыр ве этрафта олгъан эр шейден ильхам алмакъ мумкюн, – дей о.
Султание урба устюнде махсус бояларнен чешит гузель ресимлер япмагъа биле. Бунъа оны америкалы модельер ве дизайнер Вирджил Абло ильхамландыргъан. Тасили боюнджа мимар олгъан ве бу саада чалышкъан иджаткяр гузельден-гузель мот урбаларны мейдангъа кетирип башлагъан ве бойледже дюньяджа белли дизайнер олгъан…
Весиле МЕНУСМАН
Девамы «Янъы дюнья»да №3(1697) 27.01.2023