Материал о выставке художницы Заремы Неметлаевой
Январь 17-де Къырымтатар девлет академик музыкалы драма театрининъ санасында энди экинджи сефер «Багъчасарай чешмеси» адлы спектаклининъ нумайышы олып кечти. Бу сефер де баягъы семетдешимиз спектакльнен меракъланып, оны козетип, хош дуйгъулар алмагъа тешриф буюргъан. Лякин оларгъа шу куню тек спектакль дегиль, театрнинъ фойесинде нумайыш этильген серги де яхшы теэссуратлар багъышлагъандыр.
Театрнинъ хадимлери санат адамларыны бирлештирмек макъсадынен адеттеки спектакль акъшамларында къабилиетли генч иджаткярларымызны давет этип, халкъны оларнынъ иджадынен таныштырмагъа ниетленгенлер. Иште, январь 17 куню такъдим этильген серги истидатлы рессам Зарема Неметлаеванынъ иджадына багъышланды.
Биз Зарема Неметлаеванынъ иджады ве аятынен окъуйыджыларны энди таныш эткен эдик. Кефеде яшагъан рессам ягълы боялар, акварель ве графика техникаларында иджат этип, кетенлерде буюк усталыкънен Къырымнынъ аджайип манзараларыны, денъизни, эски къырымтатар сокъачыкъларыны тасвирлемеге севе. Къызнынъ тек пейзажлары дегиль де, натюрмортлары да сейирджининъ юзюнде тебессюм догъура, онъа сыджакълыкъ ве хош дуйгъулар багъышлай.
Генч рессам кениш джемаатчылыкъкъа даа яхшы белли дегильдир, амма театр такъдим эткен сергилер саесинде миллетимиз бойле джевхерлерни чокъча танып башлар деген умюттемиз.
Къырымтатар академик музыкалы драма театри эдебий-драматик болюгининъ мудири, педагогика илимлери докторы Ремзи Девлетов нумайыш этильген серги бугуньки акъшамны яраштырып, мусафирлерде эйи теэссуратлар догъураджагъына ишанч бильдирди:
–Зарема Неметлаеванынъ сергиси бу акъшам бир эльнар кибидир. «Багъчасарай чешмеси» спектаклини сейир этмеге кельген сейирджилер бу истидатлы къызнынъ иджадынен таныш олып, озьлери ичюн янъы бир адны кешф этерлер. Эндиден сонъ эр бир спектакль нумайышында фойемизде семетдешлеримизни истидатлы генч иджаткярларымызнен таныш этмеге истеймиз. Бу тешеббюске пек къувандыкъ.
Биз даима халкъымызгъа бирлик етишмегенини айтамыз. Лякин адамларны бирлештирген эсас шей – санат олгъаныны анъламакъ керекмиз. Тасвирий санат, эдебият ве музыка бизлерни бирлештирген эсас шейлердир…
(Девамы газетада)
Весиле МЕНУСМАН
«Янъы дюнья»да №2(1696) 20.01.2023