Материал о премьере спектакля «Багъчасарай чешмеси» («Бахчисарайский фонтан»)
Кеченде Къырымтатар девлет академик музыкалы драма театринде «Багъчасарай чешмеси» спектаклининъ премьерасы олып кечти. Спектакльни Къырымда нам къазангъан санат эрбабы Юрий Хаджинов къойгъан. Ондан гъайры эсер узеринде саналаштырыджы рессам Р. Файзарахманов ве балетмейстер А. Белялов чалышкъанлар.
Пьесаны яш иджатчы Эдип Эмир язгъан. Муэллиф Пушкиннинъ сюжетине янъы унсурлар ве гъаелер кирсетип, халкъымыз ичюн гъает актуаль ве муим меселелерни айдынлатып олды.
Санада нумайыш этильген эсерде Герай хан ве онынъ ильк къарысы Зарема арасында олгъан буюк ашкъ косьтериле. Лякин он беш йыл девамында чифтнинъ эвляды олмагъаны ичюн Лехистандан асылзаде Мария Потоцкая кетирильгенинен, хан онъа эвлене, баба олмагъа истей. Бу эйи ниети аз къала ханлыкъкъа дешетли фаджиа кетире биле, лякин ханны юректен севген Зарема хиянетлерге берильмей, аджджы акъикъатны гизлей, ханнынъ аятыны ве Ватан огърунда джаныны къурбан эте.
Пушкиннинъ «Багъчасарай чешмеси»нде Зарема бир гурджи къызы оларакъ косьтерильген олса, Эдип Эмирнинъ Заремасы къырымтатар къызыдыр. Муэллиф оны федакяр, мерхаметли, джесюр ве ватанпервер инсан этип косьтере, къырымтатар къадын-къызларына там бойле чизгилер хас олгъаныны анълатмагъа тырыша.
– Асылында Зарема киби къараман вастасынен ханлыкъ заманында олгъан къадын-къызларымызны дегиль де, 1944 сенеси Ватанымызны къорчалагъан ве джебелерде курешкен къараманларымызны косьтермеге истедим. О агъыр дженк ве сюргюнлик йылларында миллетимиз къадынларымыз саесинде аякъта къалып, гъайрыдан тикленип олды, – дей Эдип Эмир.
О, миллетимиз ичюн гъает муим олгъан бирлик мевзусына да токъуна. Мария Потоцкая Хан ве къардашы Къалгъа султан арасындаки багъны узип, бойлеликнен, фесат къозгъамагъа ынтыла. Яни, бирликли душман къуветли олгъаныны анълап, шу бирликни бозмагъа тырыша…
Весиле МЕНУСМАН
Девамы «Янъы дюнья»да