Материал о Найле Султановой, увлекающейся витражной росписью по стеклу
Севимли балалар, бугунь сизге даа бир истидатлы къызчыкъ – Найле Султанованынъ иджады акъкъында тариф этмеге истеймиз.
Къызыл къую (Ленино) районында яшагъан бу къыз декоратив-амелий санатнен меракъланып, гузель эсерлер ярата. Он учь яшлы Найле ишнинъ нетиджесинден дегиль, чокъча иджадий джерьяндан зевкъ алгъаныны сёйлей, чюнки иджат онъа гонъюль раатлыгъы берип, хош дуйгъулар багъышлай экен. Найле башта миллий оюнларнен, сонъра гимнастиканен мешгъуль олгъан, амма декоратив-амелий санатнен таныш олып, бу санат чешити юрегине якъын олгъаныны анълагъан.
Найле декоратив-амелий санат боюнджа дерслерде къатнап, озю ичюн янъы ве меракълы шейлерни огрене. О, чокъча декупаж техникасыны бегенгенини къайд эте.
– Дерслерде къуругъан чечечиклер, чешит чёплерден эль ишлерини япамыз. Энъ чокъ декупаж техникасында чалышмагъа севем. Ресим япып, узерине чешит къуру чечек, карпасина ве башкъа мадделерни япыштырам, – деп анълата Найле.
Найле декупаждан гъайры джам устюнде ресимлер (витражная роспись по стеклу) япмагъа да севе. Якъында къызчыкъ Халкълар достлугъы эви тарафындан тешкиль этильген джумхуриет ярышында джамресим эснафы номинациясында иштирак этип, экинджи ерге наиль олгъан.
– Мен ярышкъа учь ишимнинъ фотосыны ёлладым. Бир эсеримде миллий урбаларымызны кийген йигит ве къызны, экинджи эсеримде эски Къырым сокъачыгъыны ве къырымтатар къартбабасыны, учюнджи джамресимде исе кузьде джыйылгъан берекетнинъ ресимини яптым. Ярышнынъ лауреаты олгъаныма пек къувандым, – деп пайлаша Найле.
Генч иджаткяр базы эсерлерни яраткъанда бираз зорлангъаныны айта. Лякин аилеси ве устазынынъ дестеги саесинде кене эминлиги пейда олып, янъы эсерлер яратмакъ истеги уяна. Найле келеджекте де озь эсерлеринде миллий аэнклерни акс эттирмеге истей. Бундан гъайры келеджек зенаатыны о, иджатнен багълап, дизайнер олмакъны арзу эте. Биз Найлеге арзуларынынъ мытлакъа керчеклешмесини тилеймиз!
Весиле МЕНУСМАН
«Янъы дюнья» №46(1688) 25.11.2022