Материал о публицистических статьях Абдурешида Медиева
Бир де-бир халкънынъ башына агъыр бир ал келип тюшкенде онынъ гонълюни алгъан, яраларыны саргъан, къыйынлыкъ ве зорлукъларны енъмек ичюн чыкъыш ёлларыны косьтерген языджылар, яни «инсан къальбининъ муэндислери» олмай, ким олмакъ керек, аджеба?!
19-нджы юз йылынынъ девамында халкъымызны туз киби иритип битирген иджрет мусибетини эксильтмек, токътатмакъ ишине мутефеккиримиз Исмаил Гаспринский ортагъа къойгъан эмеги, гъайрети, азми акъкъында ишбу макъалемнинъ экинджи къысмында хатырлаткъан эдим. Амма халкъымыз ичюн бу бир олюм ве къалым сыфатыны алгъан меселеден о заманда ич бир зиялымыз, ич бир эдибимиз четте къалмагъан эди десек, янълыш олмаз беллейим.
Бу хусуста даа бир корюмли миллий эрбапларымыздан языджы, нашир, Русие империясы II Думасынынъ векили Абдурешид Медиевнинъ (1881-1912) фаалиетинден бир къач мисаль кетирмек истейим.
Абдурешид Медиевнинъ 1902-1905 йыллары арасында Бакуда рус тилинде нешир олунгъан «Каспий» газетасынынъ саифелеринде «Крымские письма» умумий серлева астында 24 макъалеси басылып чыкъкъан эди. Шу макъалелерде къырымтатарларнынъ медений, икътисадий ве ичтимаий аятлары акъкъында тасвир этильмекнен бир сырада иджрет меселеси де даима дикъкъат меркезинде олгъаныны коремиз.
Абдурешид Медиевнинъ «Каспий» газетасынынъ 5.11.1902-де басылгъан биринджи макъалеси ярымададаки къырымтатар эалиси арасында верем хасталыгъынынъ кениш таркъалгъанына багъышлангъан олса, 16.11.1902-де чыкъкъанында исе шу сене Къырымда юзь берген ем къытлыгъы акъкъында гъает ифадели ве бугуньде биле юреклеримизни якъып якътыргъан бир шекильде икяе этиле: «Переживаемая Крымом в этом году бескормица принимает все более и более угрожающие размеры. В степных экономиях солома встречается как редкость, а что же касается деревень, то там еще с октября начали кормить скот старой соломой крыш и аршанных заборов, так как все, что имелось в запасе, еще до сентября было съедено возвращающимся впроголодь с полей скотом. Не менее печальную картину представляет начало наступившего нового земледельческого года. Весь август, сентябрь и октябрь прошли без дождя, так что озимые пришлось заронить в совершенно сухую почву. Всходы получились чрезвычайно плохие, сухие сильные ветры местами повывернули их, и земледельцы теперь еще начали опасаться за будущую судьбу озимых. 4-го ноября почти повсеместно в Крыму выпал первый снег, но надежды земледельцев, что хоть снег придет на помощь озимым, не оправдались: снег выпал в весьма малом количестве и скоро растаял…».
Нетиджеде орталыкъта ачлыкъ хавфы пейда ола ве юрташларымыз арасында къайта баштан иджрет фикирлери къозгъалып башлай…
Айдер ЭМИРОВ
Девамы «Янъы дюнья»да №44(1686) 11.11.2022