Материал посвящен Дню крымскотатарской письменности и культуры
Арпатта Къырымтатар язысы ве медениети куню
Ноябрь 2-де Алуштанынъ Арпат (Зеленогорье) коюндеки Дюнья тиллери музейинде Къырымтатар язысы ве медениети куню къайд этильди. Госкомнац ве Халкълар достлугъы эви тарафындан тешкиль олунгъан тедбирлер черчивесинде тиль меселесине багъышлангъан «тёгерек маса» да отькерильди. Тедбирнинъ башында музейнинъ башы Татьяна Фотина музей заллары бойлап экскурсия кечирди. Ишбу уникаль музейде бинълернен тиллерден сесли ве язылы нумюнелер, озьгюн экспонатлар ерлешкен.
Музейде кечкен «тёгерек маса»да Госкомнацтаки идаренинъ башы Длявер Османов, Ф. Якъубов адына КъМПУнинъ профессоры Исмаил Керим, В.И. Вернадский адына КъФУнинъ доцент ве филология илимлери намзетлери Эдие Меметова ве Шевкет Юнусов чыкъышта булунып, къырымтатар тилини яшатмакъ ве оны инкишаф эттирмек гъает муим меселе олгъаныны, тильге севги ве урьмет энъ-эвеля аиледен башлангъаныны къайд этип, бу меселени ялынъыз бир якъадан баш чыкъарып аль этмек мумкюн олгъаныны айттылар. Джумледен, чыкъышлар эснасында халкъ арасында файдалы корюшювлер кечирмек, тильнен багълы лейхаларны Госкомнацнынъ грантлары эсабына амельге кечирмек киби меселелер де бакъылды. «Янъы дюнья» газетасынынъ баш муаррири Сейран Сулейман Исмаил Гаспринский адына медиамеркез тарафындан чешит тиллерде чыкъарылгъан газета, меджмуа ве китапларны музейге багъышлады ве тильни яшатмакъ ичюн, джумледен, миллий неширлеримизге де къолтутмакъ кереклигини ургъулады.
КъФУнинъ студентлери Зера Ибраимова ве Эсма Сейтумерова чыкъышта булунаракъ, студентлерде тильге меракъ догъурув акъкъында айтып, чешит эсерлерни къырымтатар тилине терджиме этмек, балалар ичюн ана тилинде огретиджи эм де инкишаф эттириджи оюнджакълар, мультфильм ве къулланмалар азырлав хусусында фикир ве тевсиелеринен пайлаштылар…
А. ЯШАР
Девамы «Янъы дюнья»да №43(1685) 4.11.2022