Материал о передаче ценной коллекции библиотеке им. И. Гаспринского
Октябрь 24 куню И. Гаспринский адына джумхуриет къырымтатар кутюпханесинде «Ана-юрт» медений-улькешынаслыкъ лейхасы черчивесинде профессор, джогърафия илимлери докторы Эдуард Мурзаевнинъ китапларыны, топонимика боюнджа весикъаларыны ве шахсий эшьяларыны кутюпханеге эдие этюв тедбири олып кечти. Тедбир Медениет назирлигининъ дестегинде отькерильди.
Кутюпханенинъ мудири Гульнара Ягьяева Ф. Якъубов адына КъМПУ тарих кафедрасынынъ профессоры Владимир Поляковны такъдим этер экен, кутюпханеге джумертликнен китаплар багъышлагъан бу алимнен энди чокътан берли девам этип кельген достлукъ алякъалары акъкъында икяе этти. Мына, бу сефер де Владимир Поляков Исмаил Гаспринский адына кутюпханеге эки уникаль коллекцияны эди этти. Булар: профессор, джогърафия илимлери докторы Эдуард Мурзаевнинъ бир сыра китаплары, онынъ чешит йылларда къазангъан медаллери эм де В. Поляковнынъ озюнинъ муэллифлик китапларынен бирликте шахсий китапханесинден алынгъан неширлердир.
– Эминликнен айта билем ки, бугунь кутюпханеде сакъланылмакъ ичюн берилеяткъан китаплар – Къырымда топонимика боюнджа энъ зенгин коллекцияларнынъ биридир. Ондаки эр бир китапнынъ озь тарихы мевджут, оларнынъ бир чокъларыны манъа Эдуард Мурзаевнинъ озю багъышлав метни иле эдие эткен, даа бир сойларыны вефатындан сонъ къызы берген эди…
Гульнара ИЛЬЯСОВА,
И. Гаспринский адына джумхуриет кутюпханесининъ хадими
«Янъы дюнья» №42(1684) 28.10.2022