Къабарткъысыз макъсыманы азырламакъ ичюн 4 стакан тары, 6 аш къашыгъы бал, 6 литр талыкъ сув, къатып къалгъан отьмек четлери керек олур.
Хош къокъунен ашлангъан тары макъсымасыны пиширильмеген тарыдан азырлангъанлар. Бир къач кере талыкъ сувда темиз этип ювулгъан тарыны, кереги къадар балны, отьмек четлерининден азырлангъан бир къач кесек пексиметни лянкли къазангъа я да шише савуткъа къойгъанлар. Сонъра къайнатылып бираз сувутылгъан талыкъ сувны устюне кереги къадар тёккенлер. Къазаннынъ устюни эки-учь къатлы безнен орьтип, къаранлыкъ ве сыджакъ ерде туткъанлар. Эки-учь кунь кечкен сонъ къувамына етип, азыр олгъан макъсыманынъ дадыны арттырмакъ ве къуветлештирмек ичюн макъсымагъа майыс балы къошкъанлар. Буюк сыкъ элеклернинъ узерине без яйдырып макъсыманы сюзгенлер. Сюзюльген макъсымагъа дадлы къокъу бермек ичюн макъсыма тёкюледжек савутларнынъ ичине экишер япракъ мор нане, фесильген, базыда гуль япракълары быракъкъанлар. Савутларнынъ агъызыны къапатып, оларны акъар салкъын сувгъа, я да чокъракъ суву топлангъан гольчиклерге далдыргъанлар. Эвель заманларда макъсыма толдурылгъан темиз мешин савутларны буз киби салкъын къую сувунда да туткъанлар. Салкъын-салкъын ичкенлер. Къырымда чилле сыджагъындаки сувсакълыкъны шу джумледен салкъын макъсыманен де къандыргъанлар.
Айше КОКИЕВА
«Янъы дюнья» газетасындан