Материал посвящён жизни и творчеству крымскотатарского общественного деятеля, тюрколога и поэта Бекира Чобан-заде
Бекир Чобан-заденинъ эдебий яратыджылыгъы халкъымызнынъ къыйметли рухий зенгинлигидир. Шаир озь шиирлеринде азат халкънынъ алидженап дуйгъуларыны акс этти, инсанларны медениетке, илимге чагъырды. Урьметли окъуйыджыларымыз, бу макъалени Бекир Чобан-заденинъ иджадына багъышлаймыз.
Бекир Чобан-заденинъ омюр ёлу
Белли шаиримиз, джемаат эрбабы Бекир Чобан-заде Къарасувбазар шеэринде, Къуртваап чобаннынъ аилесинде догъды. Он учь яшынадже о мырза ве байларнынъ къолунда чобан ярдымджысы олып чалышты. Сонъ, кеч олгъанына бакъмадан, биринджи сыныфкъа окъумагъа кирди. Лякин озь истидады ве исрарлыгъынен бир йыл ичинде бутюн башлангъыч мектеп программасыны менимсей ве дигер балаларнен берабер имтиан бермеге азырлана. Имтианда Бекир озюнинъ сонъ дередже терен мундериджели ве толу джевапларынен муаллимлерни темиз шашыра.
«Иште, санъа чобан огълу!» – дейлер олар тааджипленип. Шу вакъыттан башлап Бекир озюне «Чобан-заде» (Чобан огълу) лагъабыны ала ве бу лагъапнен омюр бою гъурурлана. 1909 сенеси Чобан-заде Къарасувбазар шеэр головасы ве озюнинъ оджасы олгъан Решид Медиевнинъ ярдымынен Джемиет-и хайрие эсабына Истанбулдаки «Султание» медресесине окъумагъа ёлланыла. О, андаки университетте арап ве франсыз тиллери боюнджа алий курсларгъа къатнап, бу тиллерни мукеммель суретте менимсей.
Поэзиягъа авеслик де Бекирде шу вакъытта пейда ола ве о, озюнинъ ильки шиирлеринден бирини «Чобан-заде» имзасынен бастыра. 1914 сенеси Бекир Чобан-заде Истанбулдан къайтып келе ве Одессагъа барып, анда бир йылгъадже славян тиллерини огренювнен мешгъуль ола. Бу вакъытта биринджи джиан дженки башлана ве Чобан-задени Австрия-Венгрия джебэсине ёллайлар.
1914 сенесининъ сонъунда о венгрлерге эсир тюше. Чокъ тиллерни бильгени ичюн оны Будапешт университетининъ тарих-филология факультетине окъумагъа къабул этелер. 1918 сенеси университетни битире ве бир йыл девамында даа докторлыкъ диссертациясыны азырлавнен мешгъуль ола.
XIII асырнынъ сонъунда Къырымнынъ Солхат шеэринде (Эски-Къырым) язылгъан «Кодекс Куманикус» лугъатыны огренип башлай. Бу лугъат онынъ эдждатларынынъ, яни къуман (къыпчакъ) тилининъ ильки абидеси олгъанындан зияде меракъланып рухлангъан яш алим окъувынынъ сонъунадже «Кодекс Куманикус» абидеси ве тюркий тиллерде артикуляция темели» мевзусында тедкъикъатыны азырлап битире.
1919 сенеси майыс 18-де о айны мевзуда фельсефе илимлери докторы дереджесине диссертация къорчалай. Сонъра Будапешт ве Лозанна (Швейцария) университетлеринде дерс бере ве 26 яшында шу университетлернинъ профессоры олып сайлана.
Лиля Велиева
Продолжение в газете «Мераба» № 38 (352), 30 сентября 2022