Материал о творчестве художницы Алие Велишаевой.
Эгер семетдешлеримизден: «Бизим адамлар энъ зияде санатнынъ анги чешитинен мешгъуль олалар?», – деп соралса, эминим ки, пек чокълары тюшюнип де отурмазлар: «Рессамлар», – деп джевап берирлер. Олар керчектен де халкъымыз арасында чокъ олып, буюк истидат ве меаретлеринен айретте къалдыралар. Къырымнынъ тазе ве темиз авасыны вуджудына синъдирип, аджайип табиат манзараларымызны козетип ве ильхамланып, эр бир рессам Ватанымызгъа олгъан севгисини фаркълы шекильде акс эттире ве озьгюн, меракълы эсерлеринен айретте къалдыра.
Бугунь сизни таныш этеджегимиз рессам — Алие Велишаева да чокъусы иджаткярларымыз киби ябанджы улькеде догъып, сонъра тамырлары, эдждатлары олгъан топракъларгъа кельди. Къырымнынъ табиаты къызнынъ иджадий рухуны даа зияде ачып, келеджекте рессамлыкъ санатыны сечмесине себеп олгъандыр деп беллейим.
Алие Велишаева Озьбекистаннынъ Чырчыкъ шеэринде догъгъан. 1995 сенеси къорантасынен Къырымгъа кочип, Багъчасарай шеэринде ерлешкен. Бу ерде мектепни битирип, Къырым муэндислик-педагогика университетининъ тасвирий ве декоратив-амелий санат болюгине окъумагъа кирген.
Алие Велишаева чокъусы рессамлар киби, балалыкътан ресим япмагъа севген. «Балалар багъчасында ве мектепте гузель ресимлер япкъаным ичюн мени эр вакъыт макътай эдилер. Башлангъыч сыныфларда мен Дисней мультфильм къараманларынынъ ресимлерини япмагъа пек севе эдим. Юкъары сыныфларда исе къалемнен меджмуаларда косьтерильген моделлернинъ ресимлерини япып башлагъан эдим», — деп икяе эте Алие ханым.
Иджаткяр асылында озь аятыны тасвирий санатнен багъламагъа ниетленмеген, лякин онынъ къальби даима иджаткъа ынтылгъан. Алие анасынынъ орьмеджиликнен мешгъуль олгъаныны сыкъ-сыкъ козетмеге севген ве нетиджеде озю де орьме ве нагъышнен меракъланып, атта бир вакъытлары Къуран къапларны миллий нагъышларымызнен сюслендирген. «Догърусыны айткъанда, рессам олмакъны тюшюнмей эдим, лякин зенаатым иджатнен багълы олгъаныны пек истедим. Эвеллери тасвирий санат меним ичюн бир хобби олып, ресимлерни тек кимгедир эдие оларакъ япа эдим. Иште, шойле бахшыш этильген бир ресимим саесинде ильк джиддий муштерим де пейда олды. Шимди энди ресимлерни сымарыш эсасында япам», – деп пайлаша рессам.
Чешит жанр ве техникаларда аджайип гузель ресимлер яраткъан Алие Велишаева балалыкътан тасвирий санаткъа мейиль берген олса да, бу ёнелиште ильк устазы тек университетке кирмеге азырлыкъ корьгенинде пейда олгъан. Бундан эвель иджаткяр тасвирий санатнынъ сырларыны озь башына ачмагъа тырышкъан. «Университетнинъ тасвирий ве декоратив-амелий санат болюгине киреджекте, балалар ичюн рессамлыкъ студиясына барып, анда истидатлы инсан – Ольга Баранник иле таныш олдым. О, манъа рессамлыкъ санатынынъ инджеликлерини огретти», – деп тариф эте иджаткяр…
Весиле МЕНУСМАН
«Янъы дюнья» – №35(1677) 9.09.2022
——————————————-