Материал о композиторе Урьяне Кенжикаевой
Къырымда нам къазангъан артист, Украинада нам къазангъан санат эрбабы, Ф. Якъубов адына КъМПУ музыка санаты кафедрасынынъ доценти Урьяне ханым Кенжикаеваны эр кес таный, десек янъылмамыз. Онынъ иджады кимсени ляйкъайд къалдырмай. О, эм белли йырджы, эм истидатлы бестекяр ве бир чокъ йырларнынъ муэллифидир. Онынъ йырларында миллетнинъ руху ифаде олуна. Бир сыра йырлары исе севги деген ульвий дуйгъугъа багъышлангъан. О фортепиано чалып, янъы йыр ве нагъмелерни ильхамланып ярата. Бир инсанда эм йырламакъ, эм чалмакъ, эм бестекярлыкъ истидаты сийрек расткелинир. О гузель бир оджа, эвлятларыны севген бир анадыр. Оны Къырымда ве онынъ тышында мухлислери даима самимий ве гурьдели эльчырпмаларнен къаршыламакъталар.
Урьяне ханым там манаджа иджаткяр олып, атта лакъырды эснасында биле фортепиана башына отурып, ойле чала биле ки, санки онынъ огюнде рыкъма-рыкъ толу зал бар. Урьяне ханым къырымтатар, рус, украин, поляк ве франсыз тиллеринде йырлай. Къырымда эрмени, рус, еудий джемаатлары оны озь тедбирлерине даима давет этелер.
– Мен 1958 сенеси Горький виляетининъ Макарьево шеэринде догъдым. Къорантада учь бала – агъам Осман (1955), мен ве Зера (1965) осьтик. Ана-бабамызны севип-сайып буюдик, шунынъ ичюн де ана ве бабалар акъкъында йырларым иджадымда айры бир ер туталар. 1977-1982 сенелери Ташкент консерваториясында окъудым. Оны битирген сонъ «Къайтарма» ансамблинде пианист олып чалыштым. Сонъра «Эфсане», «Учан-су» ансамбллеринде де ишимни девам эттим. Эки огълан баланынъ анасы олам.
2012 сенеси Полониянынъ Краков шеэринде музыкалы конкурста «Эдит Пиаф адына Гран-при» къазандым. 2014 сенеси Полонияда «Zachor» еудий медениети фестивалинде иштирак эттим, Белосток шеэринде соло концерт бердим. Бу концертте Америкадан кельген чуфутлар да булунды. Концертте аналар акъкъында къырымтатарджа, украиндже, русча, поляк ве еудийдже йырлар йырланды. О вакъыт ана акъкъында тюркюни еудийдже йырлагъанымда еудийлер аякъкъа къалкъып, аналаргъа олгъан урьметлерини нумайыш эттилер. Мен бунъа пек тааджиплендим. Чюнки мен ана акъкъында сенелердже йырлай эдим, амма кимсе бойле давранмады. Айны шу сене «Podlaska oktawa kultur» халкъара музыка, медениет ве фольклор конкурсында гъалебе къазандым.
Йырларым гузель Къырым эм де миллетимнинъ фаджиасы акъкъындадыр. Иджадымнынъ эсас мевзусы сюргюнлик десем де олур. Чюнки бу мевзу мени даима раатсызлай…
Серане КЕНДЖАЛИ
Девамы «Янъы дюнья»да