Материал об участнике партизанского движения Гафаре Абдурамане, уроженца села Уркуста
Байдар вадийи Къырымнынъ энъ гузель манзаралы ерлеринден бири сайыла. Бу ерде чайырлар, дагълар, къобалар, учансувлар, дагъ дерьялары, къызылчыкъ ве джевизлер оськен орманлар… бар.
Байдар вадийининъ авасы тюрлю-тюрлю шифалы отларнынъ къокъусынен толу. Бу ерде Къырым сыгъынларынынъ тюрлерини де корьмек мумкюн. Бу ерге инсан аягъы та къадимий замандан келип баскъан, онынъ ичюн де о чокътан-чокъ тарихий ядикярлыкъларнен пек бай.
Бир заманларда Байдар вадийининъ энъ буюк кою олгъан Уркустанынъ асырлар девамында озь аньанелери, турмуш тарзы, озьгюн теляфузы бар эди. Ишсевер халкъы согъан, сарымсакъ, къартоп, бибер ве дигер осюмликлер сачып асрагъан. Кой эалиси айванасравджылыкъ ве тиджаретнен къоранталарыны бакъа эди.
Лякин 1941 сенеси июнь айында амансыз дженк башлана. Ноябрьде исе Байдар ве Варнаутка вадийлеринде арбий арекетлер эп кенишлей. Немселернинъ баш макъсады олгъан Акъяргъа пек якъын ерлешкен койлер бомбалар тюбюнде къала. Манштейн команданлыгъындаки 11-нджи ордунынъ аскерлери шеэрге таба илерилейлер. Къырымнынъ эр еринде олгъаны киби Уркустадан да къолунда силя тутмакъ икътидары олгъан бутюн эркеклерни дженкке сефербер этелер. Джебэден азат этильген кой фааллери исе партизан ве гизли арекетке къошулалар.
Гъафар Абдураман 1910 сенеси Уркустада догъды. Дженктен эвель Уркуста кой шурасынынъ реиси эди. Къырымны немселер ишгъаль эткен сонъ, койдешлеринен берабер ормангъа кете. Балыкълава районындаки Калашников отрядында сиясий реберлик (парторг) вазифесинде булуна…
Шемсие ЛЮМАНОВА
Девамыны газетада окъунъыз «Янъы дюнья» №30(1672) 5.08.2022