Интервью с солистом Крымскотатарского государственного академического музыкально-драматического театра Эрнэсом Эмирасановым.
Халкъымыз арасында ойле адамлар бар ки, оларнынъ бутюн аяты йыр ве музыканен багълы. Музыка санатынен мешгъуль олгъан чокъусы истидатлы семетдешлеримиз къырымтатар музыкасынынъ тек Ватанымызда дегиль де, башкъа улькелерде де янъгъырагъаныны арзу этелер. Бизим бугуньки субетдешимиз – истидатлы, ватанпервер, тербиели ве алидженап йырджы Эрнэс Эмирасанов.
Эрнэс Эмирасанов къырымтатар музыкасынынъ сакъланмасына, яшатмасына ве инкишаф этмесине озюнинъ бутюн анълы омрюни багъышлады. Бизим субетимизде Эрнэс бей озь иджадий ёлу акъкъында тафсилятлы шекильде тариф этеджек.
-Эрнэс бей, озь акъкъында икяе этинъиз. Не ерде догъдынъыз? Ана-бабаларынъыз Къырымнынъ насыл койлеринден?
Меним ана-бабам догъма Еди Къую районынынъ Чукъул (шимди Виноградное) коюнден. Бабам Сейтхалил Эмирасановнынъ къорантасы Озьбекистангъа Каттакурган шеэрине сюргюн этильген эди, анам Ленура Эмирасанованынъ къорантасы исе Бекабад шеэрине тюшти. 1967-джи сенелеринде анам ве бабам Къырымгъа къайтып, тувгъан Чукъул коюнде ерлешкен эдилер.
– Насыл тасиль алдынъыз?
Мен Виноградное орта мектебининъ 9-ынджы сыныфны битирдим ве имтианларны мувафакъиетнен берген сонъ, музыка окъув юртуна окъумагъа кирдим. 3-джи курстан сонъ, Киевде тасиль алмагъа къатий къарар бердим. Окъувымны музыка санаты боюнджа девам этмеге истегеним ичюн, Киевнинъ медениет ве санат миллий университетининъ эстрада вокалы болюгине кирдим.
-Санагъа чыкъмаздан эвель насыл азырлыкълар коресинъиз? Эеджанланасынъызмы?
Эльбетте, санагъа чыкъмаздан эвель белли бир эеджан пейда ола, бу пек табий шей. «Санагъа чыкъмакъ узьре эеджанланмагъан санатчы – акъикъий, самимий санатчы дегильдир». Керчектен, бу ойледир. Чюнки санагъа чыкъкъанда, сен сейирджилерге озь дуйгъуларыны, озь икяени еткизмеге истейсинъ. Онынъ ичюн сейирджилернен самимий олмакъ пек муимдир. Йырны ойле иджра этмелисинъ ки, эр бир динълейиджи озюни йырджынынъ еринде ис этмели ве бу йырны сеннен яшамалы, йыр гъамлы я да нешели олмасына бакъмадан, сенинъ чыкъышынъ эр бир динълейиджиде мусбет дуйгъуларны догъурмалы. Сейирджининъ козьлеринде меракъ ве дикъкъатны корьгенде, анълайсынъ ки, санагъа нафиле чыкъмадынъ, сени динълемеге ве чыкъышынъны сейир этмеге истейлер. Бу – эмегинъ ичюн энъ хош, энъ къыйметли мукяфаттыр. Эр бир санатчы сейирджилерине мусбет дуйгъуларны ве озь севгисини багъышламагъа тырышмакътадыр.
Лиля ВЕЛИЕВА субетлешти
ПРОДОЛЖЕНИЕ В ГАЗЕТЕ «МЕРАБА» № 30, 5 августа 2022