Статья о талантливой художнице Зареме Неметлаевой.
Июнь 18-де Кефедеки Семён Пивоваров адына кутюпханеде истидатлы рессам Зарема Неметлаеванынъ «Догъмасына Къырым себепчи олгъан эсерлер» адлы шахсий сергиси ачылды. Сергиде кефели яш рессамнынъ Къырымгъа багъышлангъан эсерлери такъдим этильди. Оларда Зарема Неметлаева эски къырымтатар сокъачыкълары ве эвчиклерини, Ватанымызнынъ гузель табиатыны, зенгин медениетимизни тасвир эткен.
Зарема Неметлаева Самаркъанд шеэринде дюньягъа кельген. 1992 сенеси аилесинен Кефе шеэрине кочькен сонъ шеэрдеки Айвазовский адына балалар тасвирий санат мектебинде рессамлыкъ унерини огренип башлагъан.
Рессам балалыкътан тасвирий санаткъа мейиль берип, аятыны иджатнен багъламакъ макъсадынен бу санатта энди уста сайылгъан иджаткярларнен чалышкъан. Даа бешинджи сыныф талебеси олгъанда декоратив рессамлыкъ боюнджа устазы Неля Мельник Зареманынъ эсерлерине дегерли къыймет кесип, шегиртининъ тасвирий санатта ихтисаслы бир рессам олмасы ичюн онъа рессамлыкънынъ сырларыны ачып башлагъан. Иште, Зарема Неметлаева о вакъыттан берли чешит ресим ярышларында иштирак этип, гузель эсерлеринен гъалебелер къазангъан. Рессам Айвазовский адына балалар тасвирий санат мектебинден гъайры Кефенинъ «Кафа» тасвирий санат студиясында да озь меаретини арттырып, ичиндеки эеджан ве дуйгъуларыны ихтисаслы шекильде тасвирлемеге огренген.
2010 сенеси Зарема Неметлаева Къырым муэндислик-педагогика университетининъ санат факультетини битире ве тасвирий санаткъа толусынен берилип, иджадий гъаелерини омюрге кечирмекни девам эте.
Чешит жанрларда иджат эткен рессам озь эсерлеринде Ватанымызнынъ тылсымлы гузеллигини, табиатнынъ парлакъ ренклерини акс эттирмеге тырыша. Бир сыра белли рессамларны ильхамландыргъан Кефе ве Къара денъиз Зарема Неметлаеванынъ ресимлеринде де сыкъ-сыкъ тасвир олуна.
Сакин я да эеджанлы денъизнинъ далгъалары, сувдаки гемилер, кунешнинъ денъиз уфугъында батмасы ресимге бакъкъан сейирджининъ юрегинде хош дуйгъулар уянтып, бу муитке далмакъ истегини уяндыра…
ДЕВАМЫ ГАЗЕТАДА
Весиле МЕНУСМАН
«Янъы дюнья» №24(1666) 24.06.2022