Материал о визите в Крым директора Ногайского театра в Крым и сотрудничестве с крымскотатарским театром
Дагъыстанда нам къазангъан артист, медениет эрбабы, Ногъай девлет драма театрининъ мудири ве режиссёры Байсолтан Джумакаевнен Ногъай театрининъ фаалиети, репертуары, Къырымнен багълы ишбирлиги ве Керич шеэринде кечкен «Боспорские агоны» фестивали акъкъында меракълы бир субет яптыкъ.
– Мен Москва шеэриндеки Б. Щукин адына театр институтыны битирдим. Институтны битирген сонъ узун йыллар Къумыкъ музыка драма театринде чалыштым. Махачкала девлет университетининъ медениет факультетинде дерс бердим. 2001 сенеси Ногъай девлет драма театрини (Дагъыстан) ачтыкъ ве онъа ёлбашчылыкъ япам. Дагъыстаннынъ Ногъай районында бизим Ногъай девлет драма театри, Ногъай халкъ чалгъы алетлери оркестри, «Айланай» фольклор-этнографик ансамбли бар. Театримизде 43 киши чалышмакъта, олардан 18 актёр. Яш олсакъ да, театрмизнинъ севиеси юксек. Умумен Дагъыстанда 12 театр бар. Арамызда ишбирлик, къавий достлукъ укюм сюрмекте. Мени режиссёр оларакъ давет этелер. Авар театринде, Лак музыкалы-драма театринде, Лезгин театринде эки спектакль къойгъан эдим. Июль айында Табасаран театринде спектакль къояджам.
Театримиз чешит фестиваль ве гастроллерде иштирак эте. Репертуарымыз пек зенгин, миллий, совет, дюнья классиклерининъ эсерлерини саналаштырамыз: Федерико Гарсиа Лорка, Еврипид («Медея» пьесасы), Азиз Несин, Тунджер Джюдженогълу, къазах, татар, башкъырт, рус пьесалары. Театр инсанларнынъ табиатларыны, медениетини, ахлякъий меселелерни, рухий ве тыш алемни, севги ве нефретни акс эттирген бир платформа. Саналаштыргъанымыз бутюн пьесалар ана тилимизде, юнан пьесаны алсакъ да, оны ногъай тилине терджиме этип саналаштырамыз. Яш, истидатлы, тильни бильген генчлеримиз бар, олар терджимелерни беджерелер. Бала масалларыны исе рус тилинде саналаштырамыз. Бугунь балаларнынъ чокъусы ана тилини бильмей ве бу меселеси тек бизде дегиль. Базы адамлар масалларны русча саналаштырасынъ, деп мени тенкъид этселер де, мен: «Башта телеканаллар, радио толусынен ана тилинде олсун ве, энъ эсасы, эвлеринъизде ана тилинде лаф этинъиз ки, балалар лаф этсинлер, бизлер де ана тилимизде спектакллер саналаштырайыкъ», – деп джевап берем. Бала спектакллерини азырламакъ даа да къыйын. Ногъай балаларындан башкъа, ногъайджа бильмеген миллетлер де бар, олар да бала спектакллерине келелер. 16 яшындаки осьмюрлер, генчлер ичюн артыкъ толусынен ногъай тилинде спектакллер къоямыз…
ДЕВАМЫ ГАЗЕТАДА
Серане КЕНДЖАЛИ
«Янъы дюнья» №24(1666) 24.06.2022