Халкъымызнынъ бир къач афталыкъ газетасы бар. Оларнынъ эр бири де озь ягъында къаврула, эр бири чаресине коре аякъта къалмагъа тырыша. Тилимни тишлеп айтам, тувгъан тильде чыкъкъан неширлеримизден бириси ярын озь ишини токътатса, бунъа тек башкъа миллетлер дегиль, озь халкъымыз да къулакъ асмаз. Бир авуч абунеджимиз языкъсынар, къалгъанлар бу акъта эшитсе биле «а, что, такая газета была что ли?» дерлер.
Эбет, «была и есть», биз даа бармыз, хаберлерни, санат, медениет, эдебият, дин, спорт ве дигер сааларнен багълы малюматны ана тилимизде азырламагъа девам этемиз. Базы макъалелерни къысмен интернетте де беремиз. Газета эр афта джума куню чыкъа ве, эписи олып, йылда 52 санымызны ала билесинъиз. Бу санларны бир ерге топласанъыз, элинъизде апма-азыр энциклопедия, йылнаме ве лугъат олур.
Ана тилимизде окъуп оламаймыз дегенлер де бар. Я, ханым ве эфендилер, агъа ве къардашларым, тиль огренмек ич бир вакъыт кеч дегиль, имкян бар экен, оны эльден къачырманъыз! Тырышкъан киши ёл тапар, таш-демирге мых къакъар дегенлер.
Миллий неширлер ялынъыз тиль дегиль, олар да эм мефкурени (идеология), эм де тефеккюрни (мышление) шекиллендирелер.
Мына келеджек сенеден мектеплерде эр кунь девлет гимнини мытлакъа эшиттиреджек, байракъны эр кунь котереджек олалар. Яш несиль арасында эвельки пионерия ерини ала бильген бир арекетни де джанландыралар. Акимиет бунъа чувал-чувал акъча айыраджакъ. Бойледже, «темель» халкъкъа, девлетке уйгъун гъаелер балалыкътан ашланыладжакъ.
Нетиджеде, негизи къавий олмагъан, миллий тиль ве матбуаттан узакъ олгъанлар тез арада къыбласыны джойып, башкъа бир къавм ичине синъип кете биле. Лякин озь тамырларыны унутмагъан, озь тилининъ къадрини бильген, озь байрагъыны юксек котермеге азыр олгъанларны, юрегинден «Ант эткенмен» дегенлерни кимсе шашмалатып оламаз. Дейджегим, озюни де, балаларыны да тюшюнгенлер, шимдиден миллий неширлерге абуне олув, ана тилинде окъув, бильги ве малюмат алув меселесине джиддий бакъмалы…
Девамы газетада
«Янъы дюнья» №21(1663) 3.06.2022
Сейран СУЛЕЙМАН