Рессам Нариман Мустафаевнинъ фикириндже, ресим сейирджиде эсер ичине далмакъ, тасвир этильген муитке чоммакъ истегини догъурмакъ керек. Занымджа, Нариман агъанынъ ресимлери эр бир къырымтатар сейирджисинде шойле дуйгъу къозгъар, чюнки рессам тасвирлеген Къырымнынъ дженктен эвельки алы эр биримиз ичюн меракълы олып, юрегимизнинъ энъ назик теллерине токъуна.
Багъчасарайлы Нариман Мустафаев халкъымызнынъ чокъусы векиллери киби, ят ерлерде догъып, чешит зорлукълардан кечип, Ватанына къайтты. Иджаткяр яшлыгъында санаттан узакъ зенаат сечип, чокъ йыллар девамында Къырымда эв къурмакъ ве аилесини бакъмакъ ичюн чешит ишлерде чалышса да, иджаттан айырылмады ве сонъки йыллар девамында рессамлыкънен фааль мешгъуль.
– Нариман агъа, рессамлыкънен не вакъыт меракъланып башладынъыз, бу унерни сизге кимдир огреттими, ёкъса озь башына менимсединъизми?
– Балалыкътан элиме къалем ве кягъыт алып, бир де-бир шейнинъ ресимини япмагъа, балчыкъ ве пластилинден адамларнынъ миниатюраларыны япмагъа севе эдим. Сонъ мектепке баргъанда, сызыджылыкъ дерслеринде баягъы меракълы шейлер огренген эдим. Эмджемнинъ огълу Мустафа да пек яхшы ресимлер япа эди. О, Самаркъанд мимарлыкъ университетини битирди. Онъа да бакъа-бакъа ресим япа эдим.
Санатнен мешгъуль олмакъ ичюн даа бир кучьлю сильтемни Зарема Трасинованынъ «Ленин байрагъы»нда дердж этильген графикасы олды.
– Сиз иджаткяр бир адам олсанъыз да, Ватангъа къайткъан сонъ тюрлю ишлернен мешгъуль олгъансынъыз…
– 1990-нджы сенелерде Багъчасарайнынъ эски шеэринде бир эвчик алгъан эдик. Мен сют заводында чалыша эдим, амма анда алгъан айлыкъкъа янъы эв къурып оламайджагъымны анълап, бир йыл къадынлар аякъкъапы ясап, саттым. Ондан эвель къалпакълар тиктим. Бундан гъайры мен кучюк черчивелерде ресимлер япып сата эдим. О вакъыт белли рессам Владимир Мальковнен таныш олдым. О, рессамлыкъ боюнджа атта манъа бир къач дерс берген эди…
ДЕВАМЫ ГАЗЕТАДА
Весиле МЕНУСМАН субетлешти
«Янъы дюнья» №20(1622) 27.05.2022