Статья о юном спортсмене Ахтеме Умерове.
«Янъы дюнья» газетасынынъ апрель 15-те чыкъкъан санында Зуя миллий мектебинде киокушин боюнджа чемпионат отькерильгени акъкъында язылгъан эди. Айтмакъ керек ки, шу чемпионатта иштирак эткен балаларнынъ чокъусы бизим халкътан эди. Ерли тренер Руслан Серверович Аметшаевнинъ шахсий гъайретлери ве онынъ «Ametshaev Dojo» спорт клубы саесинде Зуя къасабасында ве умумен Къарасувбазар районында балалар арасында киокушин каратэге меракъ зияде артмакътадыр.
Сейтнафе Сейтвелиев адына 2 санлы Зуя орта мектебининъ 6-нджы сыныф талебеси Ахтем Умеров секиз яшындан берли ММА, тхэквондо ве киокушиннен огъраша. Ахтем спорт адамны эм рухий, эм де джисманий тарафтан сагъламлаштыргъаны ичюн оны бегене. Энди эки йылдан берли Ахтем чешит тюрлю чемпионатларда фааль иштирак эте. Дейик, Акъмесджитте киокушин боюнджа кечирильген чемпионатларда о башта экинджи ерни, сонъра арды-сыра биринджи ерлерни къазанды. Новороссийск ве Краснодарда олып кечкен ярышларда да мукяфатлы ерлер алды. Ахтем энди портакъал тюслю къушакънынъ саибидир. Энди къара къушакъны эльде этмекни озь огюне макъсад этип къойгъан.
«Спортнен огърашкъаным саесинде озюме эминлигим артты. Атта базыда енъильген сонъ даа чокъ огге ынтылмагъа, идманларгъа къатнамагъа, джиддий чалышмагъа башлайым. Ярышларда Сурие анам даима янымда булунгъаны да меним ичюн муимдир. Ана-бабамнынъ дестегини ис эткеним мени даима рухландыра. Илериде профессиональ спортчы я да программаджы олмакъ истер эдим. Бош вакъытларда ресимлер япам, инглиз тилини огренем, программаджылыкънен огърашам», – дей Ахтем…
ДЕВАМЫ ГАЗЕТАДА
Диляра СУЛЕЙМАНОВА
«Янъы дюнья» №17(1659) 6.05.2022
Подробности подписки