Статья посвящена талантливому художнику Рустему Ваапову.
Майыс 3-те белли къырымтатар рессамы ве иллюстратор Рустем Ваапов алтмыш беш яшыны къайд этеджек. Айтувлы сюляленинъ векили, дженктен эвель Къырымда мешур орнаменталист ве силя устасы Амет Калафатовнынъ торунчеси олгъан Рустем Ваапов буюклер ве балалар ичюн язылгъан бир сыра китапларнынъ иллюстрацияларыны ве джылтларыны безеткен иджатчыдыр.
Рессам озьгюн услюпте япкъан ресимлеринде миллий орьнеклеримиз ве белли масалларымызнынъ къараманларына янъы ренклер ве тылсым къатып, сейирджиде миллий медениетимиз ве фольклорымызгъа меракъ уяндыра.
Биз рессамнен къонушып, онынъ балалыгъы, иджадий фаалиети ве неширге азырлагъан озь масаллары джыйынтыгъы акъкъында субетлештик.
– Рустем агъа, догъгъан еринъиз, балалыгъынъыз акъкъында бираз тариф этсенъиз.
– Эр биримизнинъ балалыкъ акъкъында хатырлавларымыз чешит къумаш парчаларындан тикильген ёргъан киби, узакъ кечмишимизден кельген айры хатырлавлар парчаларындан ибареттир. Бесе-белли, бу омюрлик афызамызнынъ узакъ теренликлеринде къалгъан эеджанландырыджы дуйгъуларнынъ догъмасы нетиджесинде олгъан бир шейдир.
Мен Сырдарья озени боюнда ерлешкен къадимий Худжанд (о вакъытлары Ленинабад) деген таджик шеэринде догъдым. Панчшанбе эски шеэр районында ерлешкен буюк шеэр базарынынъ артында, балчыкътан япылгъан буюк къора-диварлар иле тар агъач азбар къапылары олгъан, тар сокъачыкъларны хатырлайым. О сокъачыкъларда эшек минген адамны я да къара фереджели къадынны расткетирмек мумкюн эди. Балалыгъымда бильхасса фередже кийген къадынлардан къоркъып, анамнынъ аркъасына сакълана эдим.
Сонъ биз Чкаловск деген санайы шеэрине кочьтик. Анда мен мектеп, политехникум битирдим, даа сонъра Душанбе политехника институтыны тамамлап, муэндис-къуруджы олдым.
– Тасвирий санаткъа севгинъиз неден башланды? Рессамлыкъкъа севги ашлагъан адамлар олдымы?
– Та балалыгъымда анам манъа ресамлыкъкъа севги ашлады. О, Къырымда белли силяджы уста ве орнаментист рессам Амет Калафатовнынъ торуны эди. Айтмакъ керек ки, анам озю де дюльбер ресимлер, нагъышлар япа эди. Биз онынъ иле рессамлыкъны, графиканы, акварель ве ягълы бояларнен япылгъан ресимлерни буюк меракънен огрене эдик.
Институтны битирген сонъ мен автомобиль ишханесинде муэндис конструктор олып чалыштым ве айны вакъытта эвде ресимлер япа, стадион ичюн дивар илянларыны азырлай эдим. Бойлеликнен, менде ресим ве шрифт (язы) техникасы джуляланды.
Ресим япув боюнджа оджа ве устазларым олмады. Ишлериме къыймет кескен ве тевсиелер берген киши анам эди…
Весиле МЕНУСМАН
ДЕВАМЫ ГАЗЕТАДА
«Янъы дюнья» №16(1658) 29.04.2022
Подробности подписки