Статья о серии книг про крымских татар – участников ВОВ.
АКЪИКЪАТ ЭР ШЕЙДЕН УСТЮНДИР
Къаранлыкътан шикяет эткендже бир мум чыракъ якъ
(Аталар сёзю)
«Аюв баласыны ашайджакъ олса, чамургъа булгъалар», дейлер. Айны шу усулны къырымтатар халкъыны ёкъ этмеге ниетленген Сталин ве онынъ ортакълары 1944 сенеси къулландылар. О йылнынъ майыс айынынъ 11-де юкъарыда ады анъылгъан къаничер тарафындан имзалангъан Къарарда ялан, уйдурма ве ифтирадан башкъа бир шей олмагъан бир талай къабаатлавлар ер алгъаны беллидир. О хайырсыз весикъада бойле дениле: «Улу Ватан дженки девринде бир чокъ къырымтатарлар Ватангъа хаинлик эттилер, Къырымны къорчалагъан Къызыл Орду къысымларындан къачып, немселер тарафындан тешкиль этильген ве Къызыл Ордугъа къаршы курешкен гонъюлли татар арбий къысымларгъа къошулдылар…».
Чокъ языкъ ки, 45 сене девамында халкъымыз ичюн Ешиль адамызнынъ къапылары къапавлы тутулмасына шу «хаинлик» тамгъасы эсас себеплерден бириси олып кельди. Амма халкъымыз огюндеки седлерни йыкъып-ашып кутьлевий суретте ватангъа къайтып ерлешмесине бакъмадан, миллий акъ-укъукъларымыз там колемде къайтарылмасыны истемеген къуветлер бугуньде-бугунь де ич тынмай бизге къаршы чылышып туралар, 1944 сенеси ортагъа чыкъарылгъан ялан ве ифтираларны даа да зияде къабартып таркъатаракъ, янъы несиль сиясетчи ве девлет эрбапларынынъ зеин ве юреклерини быландырмагъа тырышалар.
1944-тен бу куньлерге къадар бир чокъ языджы ве журналистлеримиз, Улу Ватан дженкининъ иштиракчилери ве Миллий арекетнинъ тешеббюсчилери бутюн бу яланларны ачмакъ ичюн, халкъымызнынъ бинълердже огъул ве къызлары дженк мейданларында къараманджа иштирак эткенлерини косьтермек ичюн пек чокъ гъайрет ве кучьлерини ортагъа къойдылар. Сюргюнлик девринде олсун, ана-ватан багърында олсун бу хусуста бинълердже макъалелер дердж этильди, бир чокъ китап нешир олунды. Халкъымызнынъ намусыны акъламакъ, къорчаламакъ ишине иссесини къошкъан эр бир къалем саибине юректен миннетдарлыгъымызны бильдирмек эпимизнинъ борджумыздыр. Ве бу ёнелиште япылгъан эр бир адым айрыджа дикъкъатымызгъа ляйыкътыр.
2020-нджи йылнынъ июнь айында Русиеде ве даа бир къач сабыкъ советлер джумхуриетлеринде Улу Ватан дженки башланмасынынъ 79 йыллыгъы къайд этильген куньлерде Акъмесджиттеки «Ариал» нешриятында «Великая Отечественная война 1941-1945. Награжденные Родиной»* китабынынъ биринджи джылты дюнья юзю корьген эди. Шу гъает меракълы ве файдалы чалышманынъ тертип этиджилери Асан Хуршутов ве Васви Абдураимов озь ниетлери ве макъсадлары акъкъында кириш сёзлеринде бойле анълаталар: «Эта книга — начало большой работы по увековечиванию в народной памяти имен тех, кто с оружием в руках на фронтах Великой Отечественной войны: на море, в небе и на суше от Заполярья до Южных границ нашей Родины сражался с войсками нацистских захватчиков. Тех, кто в смертельных боях отстоял Москву и Ленинград, защищал Одессу, Крым, Сталинград и Кавказ, освобождал Киев и Минск, Варшаву, Белград и Прагу, брал Кенигсберг, Будапешт и Вену, кто водружал Знамя Победы над Рейхстагом.
Эта книга о признанных и непризнанных Героях войны – о тех, кому после Победы над фашистской Германией и милитаристской Японией было запрещено возвращаться к родным очагам в Крым. Кто был вынужден «добровольно» с боевыми наградами на груди искать свои семьи, родных и близких на высылке в Средней Азии, в Повольжье, на Урале и в Сибири, куда весь крымскотатарский народ был насильственно выслан из Крыма в мае 1944 г.» (С. 3)…
ДЕВАМЫ ГАЗЕТАДА
Айдер ЭМИРОВ
«Янъы дюнья» №14(1656) 15.04.2022