Статья о творчестве молодого художника Сулеймана Меннанова.
Янгъан терек пытагъынынъ уджу адамларнынъ ресим япмакъ ичюн къулландыкълары ильк мадделерден биридир. Ресим япмакъ ичюн агъач комюринден ильк сефер не вакъыт файдаланылгъаныны бельгилемек зор, амма ресмий оларакъ комюрнен ресим япув техникасы та XV асырда пейда олгъаны белли.
Ильк вакъытлары рессамлар адий агъач комюрини къуллангъан олсалар (о, джевиз, тал ве юзюм пытакъларындан япылгъан) энди XIX асырда комюрни чекип ве онъа осюмлик туткъалыны къошып япылгъан комюрнен ресимлер яратып башлагъанлар.
Комюрнен Сандро Боттичелли, Леонардо да Винчи, Илья Репин, Теодор Жерико, Эдгар Дега киби белли рессамлар чалышмагъа севгенлер.
Бугунь сизни таныш этеджегимиз семетдешимиз де комюрнен аджайип портретлер сыза. Сейитлер районынынъ Бурнаш коюнде догъып оськен Сулейман Меннанов асыл зенааты боюнджа лейхалайыджы муэндистир, амма энди он докъуз йылдан берли комюр ве адий къарандашны элинден ташламайып, гузельден-гузель ресимлер япа.
Йигирми дёрт яшында олгъан иджаткяр рессамлыкъ санатынен даа алты яшында экенде меракъланып башлагъаныны айта. «Бир кунь мектепте Пушкиннынъ масалларындан бир сюжетнинъ ресимини япмакъ вазифесини бердилер. О вакъыт даа ресим япмагъа бильмегеним ичюн анамдан ярдым сорадым. Эсасен ресимни анам япа эди ве мен онынъ къалеми астындан чыкъкъан гузелликке бакъып, айретте къалгъан эдим. Бойле бир шейни япмакъ меним ичюн имкянсыз корюне эди. О вакъыттан берли элимден къалем тюшмей», – тариф эте иджаткяр.
Сулейман рессамлыкънен меракъланып башлагъан сонъ, эр кунь бу санатта озь усталыгъыны арттырмагъа тырышкъан. Йигитнинъ элинден бир шейлер кельмесе, о ич де мугъаймайып, яваш-яваш озь макъсадына иришкенини бильдире. Генч рессам он яшларында экенде Сеитлер къасабасынынъ ресссамлыкъ тёгерегине де къатнагъан, амма чокъусы вакъыт анда да бу санатнынъ инджеликлерини озю огренген.
Бугунь Сулейманнынъ буюк усталыкънен япылгъан ишлерине бакъып, даа алты-еди йыл эвельси о гуя ки ярамай ресим япкъаны ичюн мимарлыкъ болюгине къабул этмегенлерине инанмакъ кучь. «Мектепни битирген сонъ я муэндис, я да мимар олмакъны арзу эте эдим. Амма ресимни кереги киби япмагъаным ичюн мимарлыкъ болюгине кирип оламадым. Нетиджеде, санаттан пек узакъ олгъан «газ теминаты ве къыздырув иншаатлары» мутехассылыгъы боюнджа окъумагъа кирдим», — деп хатырлай йигит…
Девамы газетада
Весиле МЕНУСМАН
«Янъы дюнья» №13 (1655) 8.04.2022