Материал о начинающей художнице Медине Эюповой
Бугуньки макалемизнинъ къараманы – назик, эмексевер, яшы кучюк олса да, энди бир сыра сааларда озь истидатыны косьтерген йылдызчыгъымыз.
Медине Халил къызы Эюпова 2011 сенеси Къырымда догъды. Багъчасарай районынынъ Базарчыкъ (Почтовое) орта умумтасиль мектебинде 5-нджи сыныфта окъуй.
«Къорантамызда 3 бала: эки огълан ве бир къызым бар. Медине месулиетли, ярдымсевер, ишкир бир эвлят. Мектепте яхшы окъуй. Эвде де чешит емеклерни, салатларны озю япа, одасыны темиз тута. Кимерде онъа: «Сен эв ишлерини менден де яхшы беджересинъ», – деп айтам. Онынъ ресимге олгъан авеслигини бала багъчасында тербиеджиси фаркъ этти. Онынъ япкъан ресимлерине тааджипленип, истидатлы ве иджаткяр бир бала олгъаныны эр даим айта эди. Балам бош вакъты олгъанда сабырнен саатлердже ресимлер япа. Битасы ве аласы да ресим япмагъа севелер. Къартанасынынъ бабасы Бари Мурадасылов Къырымда намлы эйкельтыраш олгъан экен. Бельки де баламнынъ санаткъа мерагъы ондандыр», – деп анълата анасы Алие ханым.
Медине башта умумий ресим дерслерине къатнады, сонъра Асие оджа Эюповадан айрыджа дерс алып башлады. Медине Асие оджадан чокъ шей огрене, оджасынынъ сёзюни динълей.
Мектепте къыз аля окъуй. Энъ чокъ тарих, эсап ве ингилиз тили дерслерини бегене. Илериде косметолог-визажист олмакъ истей. Медине оюнларнен, гимнастиканен де меракълана…
ДЕВАМЫ ГАЗЕТАДА
Серане КЕНДЖАЛИ
«Янъы дюнья» №10(1652) 18.03.2022