Иджаткяр ичюн ички дюньясыны эсерлеринде акс эттирмек пек муим. Ве буны юксек севиеде беджермек ичюн о, йыл-йылдан бу саада озь усталыгъыны арттырып, мешгъуль олгъан санатында даима теджрибе къазанмагъа тырыша.
Бугунь сизни таныш этеджегимиз генч рессам Айше Къадырова да буны пек яхшы анълай ве къафасында догъгъан гъае ве хаялларыны кетенге кечирмек ичюн, даима озь устюнде чалыша.
Айше Къадырова – Къырым муэндислик-педагогика университетининъ монументаль-декоратив санат ве филология (инглиз тили ве алман тили) болюклерининъ дёртюнджи курс студенти ола. Бундан гъайры Исмаил Гаспринский адына медиамеркезнинъ иш юрютиджиси олып чалыша.
Айше балалыкътан санаткъа мейиль берип, ресим япмагъа севген. Ильк ресимлерини аля бугунь сакълагъан къыз балалыгъындан рессам олмакъ арзусынен яшагъан.
Генч иджаткяр ресимнен авескяр севиесинде дегиль де, ихтисаслы шекильде мешгъуль олмакъ ичюн, рессамлыкъ мектебинде дерс алгъан. Рессамлыкъ санатынынъ инджеликлерини шу мектепте еди йыл менимсеген Айше окъув йылларыны юрегинде буюк сыджакълыкъ иле хатырлап, устазлары саесинде баягъы бильги арттыргъаныны айта.
Генч рессам XIX асырнынъ сонъунда Фрэнкистанда пейда олгъан импрессионизм ёнелишини пек бегене. Генч иджаткяр даа озь услюбини тапмаса да, импрессионизмни озюне якъын корип, бу ёнелиште иджат этмеге ниетлене. «Энъ чокъ манзараларны (пейзаж) тасвирлемеге севем. Ресимлеримде ачыкъ ве енгиль ренклерни къулланып, манзараларымда гуллеген дженнет багъчаларыны тасвир этем. Чюнки олар там меним рухумны акс эттире. О да бу багъчалар киби гуллей, бу багъчалар киби кунешли ве парлакътыр», – деп пайлаша рессам.
Чокъусы иджаткярлар киби, Айше де кимерде иджадий инкъиразларны яшап кечире. Лякин Къырымнынъ табиаты, бильхасса, дагълары къызны ильхамландырып, онъа янъы эсерлер яратмакъ ичюн кучь ве гъайрет бере…
ДЕВАМЫ ГАЗЕТАДА
Весиле МЕНУСМАН
«Янъы дюнья» №9(1651) 11.03.2022
Подробности подписки
Инстаграм