Февральнинъ 8 къырымтатар халкъымызнынъ садыкъ къызы, хормейстер, «Эбедиет» вокал ансамбльнинъ ребери Наджие Филимонова вефат этти.
Наджие Филимонова Озьбекистаннынъ Бекабад шеэрде дюньягъа кельди. Истидатлы къыз музыкалы мектепни битирип, Бекабад шеэрнинъ музыкалы окъув юртуна кирди. Эдем Налбандовнынъ реберлигинде хорда «Танъ йылдызы» ве «Хоран» тюркюлерни йырлады. О йылларда Ташкент сейирджилери къырымтатар йырларынынъ хор шекилинде иджрасыны ильк кере динълемек фырсаты олды.
Музыкалы окъув юртуны битирип, М. Ашрафи адына Ташкент девлет консерваториягъа кирди. Мувазий оларакъ Бекабад музыкалы окъув юртунда да чалышты. 11 йыл окъув юртунынъ хорны ве оджалар ичюн ансамбльнинъ алып барды.
1988 с. Къырымгъа кочти. Бу вакъытларда Багъчасарай шеэрнинъ мектепте къырымтатар музыка дерсни окъутмагъа башлады. Бираздан шеэрде къырымтатар мектеп ачылды, Наджие ханым буюк хор тешкиль этти. «Эбедиет» адлы халкъ вокал ансамбили 2004 сенесинде иджадий ёлуны башлады. Онынъ ребери Наджие ханым Филимонова олды. 2007 сенеси ансамбль «Халкъ» унваныны къазанды.
Ансамбльнинъ репертуарына авропалы, рус, украин, къырымтатар муэллифлернинъ эсерлери кире. Халкъ йырларнынъ ишлеви академик тарзда иджра этиле. Озь концерт фаалиетинде ансамбль миллий медениетке ве урф-адетлерине динълейиджининъ меракъыны инкишаф эттирмеге тырыша, сабырлы олмакъ керегини тербие эте. Ансамбльнинъ эсас вазифеси – сейирджилерге чешит миллий медениетлерге ве адетлерге севги ашламакъ. «Эбедиет» адлы ансамбль джумхуриет ве халкъара фестиваллернинъ гъалиби ола.
Бестекяр Мемет Арслановнынъ «Эбедиет» тюркюси – энъ биринджи ансамбльнинъ йырлары. «Эбедиет» адлы вокал ансамбльнинъ иджадий хазинесинде бутюн Къырым ве халкъара конкурсаларнынъ мукяфатлары бар. Наджие Филимонова дестегинен ансамбльнинъ йырджылары чокъ мувафакъиетлер къазандылар.
Наджие ханымнынъ хатырасы юреклеримизде даимий яшайджакътыр.
Наджие ханым Аллах Таалянынъ рахметинде олсун, яткъан ери дженнет олсун. Къоранта, сой-акъраба, дост ве меслекдешлерине Аллах сагълыкъ ва сабыр берсин.
Лиля Велиева
Подробности подписки
Инстаграм