Статья посвящена юбилею ансамбля «Теселли» под руководством заслуженного артиста Мунира Аблаева.
Январь айынынъ башында «Теселли» балалар ве осьмюрлер оюн ансамбли озюнинъ отуз йыллыгъыны къайд этти. Къырымда сюргюнлик девринден сонъ пейда олгъан ильк оюн ансамбллеринден бири олгъан бу такъым кечкен йыллар ичинде алты юзге якъын балагъа миллий оюнларымызны огретип, эм Ватанымызда яшагъан миллетлерни, эм де дигер улькелернинъ сакинлерини медениетимизнен таныш этти.
Ансамбльнинъ тэсисчиси ве денъишмез ёлбашчысы – Къырымда ве Украинада нам къазангъан артист Мунир Аблаев «Теселли»нинъ мейдангъа кельмесини хатырлап, онынъ енъишлери ве отуз йыллыкъ фаалиети акъкъында буюк гъурурнен икяе этти.
Мунир Аблаев Ташкенттеки хореография окъув юртуны битиреяткъанда оджалары оны Алишер Навоий адына опера ве балет театрининъ ёлбашчыларына косьтерип, шу мешур театрге ишке алмакъны тевсие этелер. Лякин озь халкъынынъ миллий оюнларыны популярлаштырмагъа, оларны дюньягъа танытмагъа ниетленген оюнджы бу теклифни ред этип, «Къайтарма» ансамблине бара. Он йыл девамында шу ансамбльде чалышкъан сонъ оюн санатынынъ инджеликлерини даа да терендже огренмек ичюн ансамбльдеки ишинен бир вакъытта Ташкент медениет институтынынъ хореография болюгинде де окъуй. Бойледже, медениетимизге хызметини девам эттире.
Шу арада мемлекетте денъишмелер башланып, къырымтатарларнынъ Ватангъа кутьлевий авдети башлана. Мунир Аблаев даа «Къайтарма»нынъ солисти экенде Къырымда фольклор ансамблининъ тешкиль этильмесинде иштирак этмекни теклиф этелер.
– Афтада эки-учь кере манъа ве Джемиле Османовагъа Къырымдан телефон ачып, ансамбль тешкиль этмекни теклиф эте эдилер. Биз разы олып, бир йыл девамында деерлик эр ай Ташкенттен Къырымгъа репетицияларгъа къатнап башладыкъ. Ансамбльнинъ такъдими Акъмесджиттеки Профсоюзлар медениет сарайнында олды. Концерт вакътында сананынъ артында сарайнынъ бедиий реберинен таныш олып, онъа бу ерде балалар ве осьмюрлерни къырымтатар миллий оюнларына огрете биледжек бир ансамбль ачмакъны теклиф эттим. Бираздан сонъ мудирнинъ ресмий разылыгъыны да алдым, – деп хатырлай Мунир Аблаев.
Бойлеликнен, ансамбль тешкиль олунып, озь фаалиетини башлай. Мунир Аблаев ве о вакъыт профессиональ санада артыкъ танылып башлагъан чалгъыджы ве бестекяр Сервер Какура ансамбльде берабер чалышып, музыка ве хореография медениетимизни янъы бир севиеге котермеге тырышалар…
ДЕВАМЫ ГАЗЕТАДА
Весиле МЕНУСМАН
«Янъы дюнья» №3 (1645) 28.1.2022
Подробности подписки
Инстаграм