Статья посвящена творчеству известного художника Ирфана Нафиева.
Янъы йыл арфесинде Къырымтатар рессамлары бирлигининъ реиси, Ф. Якъубов адына Къырым муэндислик-педагогика университети тасвирий санат кафедрасынынъ уйкен оджасы Ирфан Нафиевнен корюшип субетлештик.
– 2021 сенеси эсас ишлеримни япып оламадым. Къазан, Москва ве Алабугъагъа (Татаристан) давет этселер де, баралмадым. Де хасталыкъ, де иш… Алабугъада эр йыл халкъара арт-симпозиум кечириле. Бу сене баралмасам да, дистанцион оларакъ иштирак эттим. «1944 сенеси фенерининъ ярыгъы» адынен бир ресим азырлап ёлладым, онлайн чыкъышымны яптым. Бу ресим оларнынъ коллекциясында къала ве оны дюнья бойлап чешит сергилерде косьтерелер. 2014 сенеси тедбирге къатылып, 10 кунь ичинде 4 кунь кездик, 4 кунь чалыштыкъ, эр бир рессам экишер ресим азырлады. Бу къадар къыскъа вакъыт ичинде белли бир мевзуда эки ресим азырламакъ къолай иш дегиль. Амма бойле ерлерде бир чокъ рессамларнен таныш оласынъ. Ялынъыз Русиеден дегиль, бутюн дюньядан рессамлар иштирак эте.
Бу сене озь юбилейиме Рессамлар эвинде шахсий сергимни япмакъ истедим, лякин олмады. Меним чокъ ресимлерим фаркълы ерлерде, мен исе янъы ресимлернен серги япаджакъ эдим. Иншалла келеджек юбилейиме олур. Лякин Алупкада Аметхан музейинде ачылгъан сергим девам эте. Исмаил Гаспринский адына кутюпханеде де юбилейим къайд этильген эди.
Къазахистандан TURAN-QAZAQ рессамлар бирлешмесинден «Туран дюньясынынъ санаты» конкурсына давет кельген эдик. Мен ве 10 къырымтатар рессамы дистанцион шеклинде иштирак эттик, эки томлыкъ альбом да чыкъаджакъ. Мен де конкурснынъ лауреаты олдым. Москвагъа Татаристан рессамларынен берабер давет этильдик. Озь ишлеримни де, Рамазан Усеинов, Эльзара Сейдаметова, Ленур Велиляев ве Энвер Изетовнынъ да ресимлерини ёлладым, тешеккюрнамелернен такъдирлендик. Бундан да гъайры Москва рессамлары бирлигинден «Аньанелерни инишаф этюв ичюн» медалинен мукяфатландым.
КъМПУде чалышып, истидатлы студентлерге эр даим къолтутып, ёлларыны ачам. Сергилерде иштирак этсинлер, деп талап этем. Бизим заманымызда оджалар ич бир вакъыт сергилерге давет этмей эдилер. Шимди исе истидатлы, къолундан кельген яш рессамларгъа ёллар ачыкъ…
ДЕВАМЫ ГАЗЕТАДА
Серане КЕНДЖАЛИ
«Янъы дюнья» 30.12.2021 №51-52(1641-1642)