Статья о деятельности ансамбля «Джемиле» и её руководителя Джафера Абдувелиева
Келеджек сенеде озюнинъ йигирми секиз йыллыгъыны къайд этеджек «Джемиле» ансамбли декабрьнинъ башында Москвада олып кечкен «Танцемания» халкъара ярышында гъалебе къазанды.
Ансамбльнинъ тэсисчиси Джемиле Османованынъ ишини энди алты йылдан берли девам эттирген оюнджы Джафер Абдувелиев озь шегиртлеринен бир чокъ халкъара ярыш ве фестиваллерде иштирак этип, къырымтатар халкъ оюныны ве миллетимизни дюньягъа танытмакъта.
Йигирми яшында ансамбльнинъ ребери олгъан йигит устазы Джемиле Османованынъ ишини мунасип девам эттирип, ишине пек джиддий янаша ве ансамбльнинъ севиесини вира котермеге тырыша.
Биз Джафер Абдувелиевнен онынъ оюнджылыкъ ве устазлыкъ фаалиети акъкъында субетлештик.
— Джафер бей, оюннен ильк танышувынъыз насыл олды? Не вакъыт хореографиянен профессиональ шекильде мешгъуль олып башладынъыз?
— Даа балалыгъымдан чешит оюн тёгереклерине бара эдим. Амма энди он эки яшымда эки догъмуш агъамнынъ «Джемиле» ансамблинде иришкен енъишлерини, анда ойнамагъа пек истедим. О вакъыт озюм ансамбльге барып, халкъ оюнларымызны огренип башладым.
Мектепни битирип, Медениет, санат ве туризм университетининъ хореография болюгине окъумагъа кирдим. 2014 сенеси группамыз Тюркиеге ёлланылды. Анда ярым йыл экстра-шоунынъ солисти олып, улькенинъ чешит шеэрлеринде ойнадым. Сонъ Ватанымызгъа къайтып, Къырымтатар девлет академик музыкалы драма театринде чалыштым. 2016 сенеси исе устазым Джемиле Османованынъ теклифинен ансамбльнинъ ребери олдым.
— Йигирми яшында бойле буюк ансамбльнинъ ребери олдынъыз. Бойле месулиетли иш сизге къыйынлыкъ этмедими?
— Эбет, 2016 сенеси меним ичюн пек зор кечти. О вакъыт даа эм окъуй эдим. Лякин янъы вазифеме яваш-яваш алыштым. Ребер олгъанымдан бир ярым йыл кечкен сонъ буюк бир концерт бердик. Оны мунасип кечирмек ичюн чокъ чалыштым. О вакъыт мувафакъиетке иришмеген олсам, бугунь бу ерде отурмаз эдим.
Ансамбльнинъ оюнджылары вира чокълаша. Бугуньки куньде оларнынъ сайысы учь юзден зиядедир…
Весиле МЕНУСМАН субетлешти
ДЕВАМЫ ГАЗЕТАДА
«Янъы дюнья» №50(1640) 24.12.2021
Подробности подписки
Инстаграм