Материал о композиторе Шамрате Бекирове и его новых проектах.
Ноябрьнинъ сонъунда ичтимаий агъларда къырымтатар музыкасы динълейиджилерине янъы «Азиз ерим» йыры такъдим этильди. Онынъ муэллифи – бестекяр Шамрат Бекировдыр. Йырны он учь яшлы Реяна Эбулисова ве муэллиф бирликте иджра этелер.
Окъуйыджымызгъа Шамрат Бекировны такъдим этер экенмиз, муэллиф КъМПУнинъ музыка болюгини битиргенини, Къырым филармониясынныъ «Таврический благовест» камер хорында йырлагъаныны, сонъра беш йыл девамында «Къайтарма» ансамблининъ солисти олгъаныны айтмакъ керектир.
– Меним балалыгъым Авель (Крымское) коюнде кечти. О вакъытлары коюмизде музыка мектеби ёкъ эди. Мен исе музыканы пек севгеним ичюн эки къадын кечирген хусусий дерслерге къатнап, фортепиано чалмагъа огрендим, – дей Шамрат Бекиров. – Бундан гъайры коюмиздеки медениет эвинд рус ве украин оюнларыны ойнамагъа огрене эдим. Миллий оюнларымызны да огренир эдим, амма о вакъытлары оларны огреткен оджа ёкъ эди. Мен музыка назариесини огренмектен зияде телевизорда эшиткен музыканы келиштирип чалмагъа севе эдим. Амма музыканы язгъанда, оны ноталаргъа кечирмек керек олгъаныны анълап, озюм мустакъиль шекильде музыка назариесини де огрендим.
— «Къайтарма» ансамблинде музыкаль фаалиетинъиз насыл башланды? Ансамбльде олгъан йылларынъыз насыл кечти?
— Даа студент олгъанымда дирижёрлыкъ боюнджа оджам Эльмира Мухтерем «Экзальте» вокал ансамблини тешкиль эткен эди. Ансамбльдеки беш адамдан бири мен эдим. Энди дёртюнджи курста окъугънымызда нам къазангъан санат эрбабы Владимир Никуленко озюнинъ «Таврический благовест» камер хорына давет этти. Владимир Николаевич пек кучьлю бир оджа. Онынъ саесинде хор иджрасы боюнджа яхшы теджрибе арттырдым. Хорда дёрт йыл чалыштым, айны вакъытта коюмиздеки медениет эвинде бедиий ребер эдим. Сонъ мени «Къайтарма» ансамблине давет эттилер. Бу ерде озюм ичюн къырымтатар фольклорыны ачтым. Эльбет, бундан эвель Урие Керменчикли, Зарема ханым, Эдип Багъчасарайлы киби йырджыларымызны динълей эдим, амма фольклорымызнен терен суретте ансамбльде таныш олдым. «Къайтарма»да дёрт йыл чалышып, сонъ Тюркиеге кеттим. Анда ярым йылдан зияде булунып, тюрк музыкасынен якъынджа таныш олдым. О, манъа пек якъын корюнди. Анкарадаки къырымтатар дернегинде де йырларымызны иджра эттим. Сонъ Къырымгъа къайтып, кене «Къайтарма»гъа бардым. Амма анда тек бир йыл чалыштым, чюнки репуртуардаки йырларны иджра этмек дегиль, чокъча озюм йыр язмагъа истегенимни анъладым…
ДЕВАМЫ ГАЗЕТАДА
Весиле МЕНУСМАН
«Янъы дюнья» №49(1639) 17.12.2021
Подробности подписки
Инстаграм