Статья о визите крымской делегации в Анкару.
Декабрь 11–12 куньлери Тюркиенинъ пайтахты Анкъара шеэринде невбеттеки Къырымтатар медениет куньлери олып кечти. Тешкилятчылардан бири, Къырым джумхуриетинде Русие Президенти даимий темсильджисининъ муавини Михаил Соломенцев Тюркиеде къырымтатар медениет куньлери ялынъыз гуманитар тюске саип олып, сиясий тедбир олмагъаныны, Къырымнынъ баш халкъы – къырымтатарларнынъ медениети ве ильмий потенциалыны косьтермек ичюн тешкиль олунгъаныны къайд этти. Медениет куньлери ве онынъ черчивесинде халкъара конференцияны Къырымдаки тешкилятчысы – В.И. Вернадский адына КъФУнинъ профессоры, филология илимлери докторы, Къырым джумхуриетининъ Башы янындаки Къырымтатар халкъы Миллий Шурасынынъ кятиби Лемара Селендили сонъки йылларда Тюркиеде къырымтатар медениет куньлери, конференциялар ве халкъара футбол матчы кечирильгенини ургъулап, къырымтатарларнынъ Тюркиедеки юртдашларынен алякъалары кеткен сайын къавийлешкенини ургъулады.
Къырымдан буюк делегация Акъмесджит-Москва-Истанбул-Анкъара ёлунен Тюркиенинъ пайтахтыа келип, мухтешем Park İnn отелинде ерлешти. Декабрь 11-де делегациянынъ векиллери Тюркиедеки Къырым инкишаф фондынынъ башы Унвер Сельнен корюштилер. Унвер Сель делегацияны селямлап, Тюркиедеки Къырымтатар дернеклери федерациясы Къырымдаки халкъымызгъа эр джеэттен къолтутмагъа азыр олгъаныны бильдирди ве инкишаф анджакъ бераберликте ола биледжегини, Къырымтатар медениет куньлери Къырымдаки ве Тюркиедеки халкъымызны бирлештиргенини къайд этти.
Декабрь 12-де исе «Къырымдаки къырымтатар тешкилятлары иле Тюркиедеки юртдашлар арасында медений-гуманитар багълар» мевзусында халкъара конференция олып кечти. Россотрудничество федераль агенлигининъ Тюркиедеки башы, тюрколог Александр Сотниченко, Михаил Соломенцев ве Унвер Сель конференция иштиракчилерини тебриклеп, ишинде мувафакъиетлер тиледилер. Конференцияда Къырым джумхуриетининъ Башы янындаки Къырымтатар халкъы Миллий Шурасынынъ векиллери Лемара Селендили, Февзи Якъубов адына Къырым муэндислик-педагогика университетининъ ректоры Чингиз Якъубов, В.И. Вернадский адына КъФУ теркибиндеки медиакоммуникациялар институты мудирининъ муавини Эрвин Мусаев, Къырым муфтияты болюгининъ башы Зенифе Вели, Къырымтатар академик музыкалы-драма театрининъ мудири Зарема Билялова, «Миллет» телеканалынынъ мудири Лиля Веджат, Муфтият хадими Гульнара Ильясова, Къырымтатар рессамлары бирлигининъ реиси Ирфан Нафиев, В.И. Вернадский адына КъФУ Филология институтынынъ мудири Александр Петренко, Къырым Илимлер академиясынынъ президенти Виктор Тарасенко, Къырымтатар медений-тарихий асабалыкъ музейининъ директоры Сафие Эминова, И. Гаспринский адына мемориаль музейнинъ мудири Эльмира Абибуллаева ве дигерлер чыкъышта булунаракъ, Къырымда илим, тасиль, медениет, санат, матбуат ве эдебият сааларында япылгъан ишлер, эльде этильген енъишлер акъкъында чыкъышлар япып, видео ве слайд-фильмлерни нумайыш эттилер…
ДЕВАМЫ ГАЗЕТАДА
Серане КЕНДЖАЛИ
«Янъы дюнья» №49(1639) 17.12.2021
Подробности подписки
Инстаграм