Статья о победительнице XIII всероссийского песенного конкурса-фестиваля Эльмаз Эмуралиевой.
Октябрь он бирден ноябрь бешке къадар йыр санаты боюнджа XIII умурусие фестиваль-ярышы олып кечти. Мезкюр фестиваль онлайн шеклинде кечирилип, мешур йырджы-актёр ве оджалар – Украина ве Русиеде нам къазангъан артист Николай Полудённый ве Украинада нам къазангъан артист Милия Полудённаянынъ хатырасына багъышлана.
Гурзуфта догъгъан кучьлю баритон сесининъ саиби Николай Полуденный ве онынъ омюр аркъадашы, сопрано сесининъ саиби Милия Полуденная аятларыны опера санасынен багълап, Днепропетровск шеэрининъ опера театринде чалышкъан эдилер. 1995 сенеси Къырымгъа келип, баягъы йыл девамында Ялтадаки Къырым гуманитар университетинде оджалыкъ яптылар, шеэрнинъ музыка мектебинде яш несильге музыка сырларыны ачтылар.
Аньане муджиби ярыш ансамбль, халкъ, академик ве эстрада йыры номинацияларында отькерильди. Ярышта Къырымнынъ чешит кошелеринде яшагъан эм яш, эм энди теджрибели вокалистлер иштирак эттилер. Олар озь чыкъышларыны видеогъа чекип, ярышнынъ жюри азаларына ёлладылар.
Ислям Терек къасабасында яшагъан семетдешимиз Эльмаз Эмуралиева да бу ярышкъа къатылып, эстрада вокалы номинациясында гъалебе къазанды.
Он алты яшында олгъан бу къыз балалыгъындан иджаткъа мейиль бергенини ве музыка онынъ аятында муим бир роль ойнагъаныны айта.
– Кучюклигимден пек иджадий бир бала эдим ве беш яшымда экенде анам меним музыкаль къабилиетлеримни корип, музыка мектебине, фортепиано болюгине бере. Бойле яшта бойле муреккеп музыкаль алетни менимсемек пек къыйын олгъаны ичюн учюнджи сыныфта оны ташлагъаным. Аля бугунь пешман этем», — деп тариф эте Эльмаз.
Лякин къыз музыка мектебини ташласа да, ичинде музыкагъа олгъан севгиси къызны йырнен мешгъуль олмагъа итеклей. О, бу санаттан узакъ оламайджагъыны анълай. Эльмаз кене де музыка алемине далып, энди бу алемден ич де айырылмагъа истмегенини анълай. – Музыка мектебинден кеткен сонъ, йырнен мешгъуль олып башладым. Устазым Мария Николаевна манъа музыкагъа акъикъий севги ашлады, онынъ саесинде мен кене музыка мектебине кирдим, — дей къыз…
ДЕВАМЫ ГАЗЕТАДА
Весиле МЕНУСМАН
«Янъы дюнья» №47(1637) 3.12.2021
Подробности подписки
Инстаграм