Агъымдаки сененинъ ноябрь 18-нде В.И. Вернадский адына Къырым федераль университетине бакъкъан Филология институты теркибиндеки къырымтатар филологиясы кафедрасы «Мен тюркшынаслыкъны сайлап алам» адлы II Студентлер онлайн-конференциясыны тешкиль этти. Ильмий тедбирнинъ хусусиетлеринден бири шунда ки, онда студентлерден гъайры аспирантлар ве мектеп талебелери де иштирак этмелери мумкюн. Мында илян этильген 50-ден зияде маруза «Тюркий тильшынаслыкъ», «Тюркий эдебиятшынаслыкъ ве журналистика», «Фольклор ве культурология» ве «Медениетлер диалогы ве полилингваль тасиль» секцияларына коре такъсимленип, олар рус, къырымтатар, татар, украин ве инглиз тиллеринде такъдим этильди.
Илериде аньаневий оладжакъ конференцияда бу кереси тешкилятчы университетнинъ студентлери сырасында Ф. Якъубов адына КъМПУ студентлери, Э. Шемьи-заде адына 42 санлы орта мектеп, А. Абденнанова адына 44-нджи орта мектеп, Майское коюндеки орта мектеп талебелеринден гъайры Къазахистан ве Татаристан аспирантлары ве студенлери де иштирак эттилер. Сонъкилерининъ чыкъышларындаки «ХIX асырнынъ эки тилли лугъатларында тиббият терминлери» (Г. Закирзянова), «Къазахистаннынъ латин элифбесине кечмеси: генчлернинъ мунасебети» (Е. Къадырбеков), «Журналистиканынъ къандас (яни ватандаш) ве мигрантларнынъ ичтимаий адаптация меселелерине джельп этильмеси» (Р. Кашапова), «Албасты» мифилогик персонажнынъ лексик-график изааты» (А. Шакирова) киби марузалары конференциягъа айрыджа тюс берди.
Бунынъ киби тедбирлер илимнен огърашаяткъан ве илериде огърашмакъны тюшюнген яшларгъа бир-биринден нелердир огренмеге ве озьара багъ къурмагъа ярдым этедир.
Шевкет ЮНУС
«Янъы дюнья» №46(1636) 26.11.2021
Подробности подписки
Инстаграм