Статья о талантливом художнике Аблятифе Сулейманове.
Сакъ районынынъ Ораз (Колоски) коюнде истидатлы рессам Аблятиф Сулейманов яшай. Керчеклик (реализм) ёнелишинде чалышкъан иджаткярнынъ эсерлери арасында энъ чокъ импрессионизм услюбинде натурадан япылгъан этюдлар расткелине. Бундан гъайры рессам якъында пуантилизм услюбини де къулланып башлагъан. Бу услюпке коре, ресим нокъта, догъру ве тюзкошели токъунмаларнен (мазки) япыла.
Аблятиф Сулейманов 1989 сенеси Ташкент виляетининъ Чырчыкъ шеэринде дюньягъа кельген. Балалыкътан рессамлыкъкъа мейиль берген. «Та бала экенимде рессамлыкъ мени джельп эте эди, бундан гъайры пластилиннен чалышмакъны да пек севе эдим. Бир де-бир шейни корьсем, бирден онынъ ресимини япмагъа истей эдим. Мени тек ресимнинъ озю дегиль де, оны япув процесси де пек меракъландыра эди. Аля бугунь меракъландыра…» — дей рессам.
Бойледже, Аблятиф Чырчыкъ шеэриндеки Хамза адына санат мектебине окъумагъа кире. «Рессамлыкънынъ эсасларыны санат мектебинде огрендим. О ерде огрендигим ресим япув техникалары мени айретте къалдыргъан эди. Манъа ресим япмагъа огреткен ильк оджамны аля бугунь хатырлайым», — тариф эте рессам.
2003 сенеси Аблятиф Сулейманов аилесинен Къырымгъа коче ве айны йылы Кезлевдеки санат мектебининъ талебеси ола. Энди умумтасиль мектебини битирген сонъ, Аблятиф алий тасилини КъМПУнинъ тасвирий ве декоратив-амелий санат болюгинде девам эттире.
2010 сенеси Тасвирий санат ве мимарлыкъ миллий академиясынынъ Къырым филиалына окъумагъа кире. Анда дёрт йыл девамында рессамлыкъ боюнджа усталыгъыны арттыргъан сонъ тасилини Киев шеэриндеки академиянынъ озюнде девам эттире. Бу ерде белли рессам Василий Гуриннинъ устаханесинде рессамлыкъ сырларыны даа терендже огрене. Аблятиф Сулейманов оджанынъ устаханесинде акъикъий санат не олгъаныны анълай, ресимлеринде денъевлер япып башлай.
«Василий Гурин Къырымдан кельген студентлерни сыджакълыкънен къаршылай эди. Чюнки озю де Къырымда догъгъан эди», — дей Аблятиф Сулейманов.
Насыл саа олса олсун, адетте, шегирт устазына бакъып, озь севиесини арттырмакъ истей. Амма Аблятиф Сулеймановнынъ фикрине коре, адамнынъ шекилленмесине устаз ве оджадан гъайры онынъ акъранлары, яш зенаатдашлары да тесир эте…
ДЕВАМЫ ГАЗЕТАДА
Весиле МЕНУСМАН
«Янъы дюнья» №45(1635) 19.11.2021