В статье рассказывается о Всероссийской переписи населения.
Газетамыз саифелеринден дефаларджа бильдиргенимиз киби, октябрь 15-тен итибарен бутюн мемлекетте, шу джумледен Къырымда эалини джедвельге алув башланып, ноябрь 8-ге къадар девам этеджек. Окъуйыджыларымызгъа бу тедбирде мытлакъа иштирак этмек зарурлыгъыны къайд этерек, эалини джедвельге алув – тувгъан тиль ве миллет акъкъында малюматнынъ екяне там ресмий менбасы олгъаныны хатырлатмакъ истеймиз.
Белли ки, сонъки эалини джедвельге алув 2014 сенеси кечирилип, Къырымда 1,9 миллион адам яшагъаны, олардан 7 бинъден зияде адам вакътынджа яшагъан эали джумлесине киргени белли олгъан эди. Амма энъ аджыныкълысы шунда ки, 2000-нджи сенелернинъ башларында сайымыз аман-аман 300 бинъ адам этрафында косьтерильген олса, 2014 сенесинден сонъ бу ракъам кескин эксильтилип косьтерильди. Эм бунда чокъусы джеэттен озюмиз къабаатлы олдыкъ. Кимдир о заманнынъ эалини джедвельге алувында иштирак этмеге истемеди, даа кимлердир «къырымтатар» олмагъа истемей, янъы миллетлер кешф эттилер. Бойледже, сёзде къырымтатар олып догъгъан адамлар анкеталаргъа озьлерини «къырымлы» «къырым», «тавр» деген ве даа башкъа бир адларнен яздырдылар. Табиий ки, нетиджеде къырымтатарларнынъ сайысы эксильди. Шунынъ ичюн халкъымызнынъ сайысы, нуфузы олдукъча там догъру акс эттирильмеси ичюн эпимиз джедвельге алувда иштирак этмек керекмиз.
2021 сенесининъ эалини джедвельге алувгъа аит янъылыкъларындан бири шунда ки, мезкюр акцияда онлайн режимде иштирак этмек мумкюн.
Бойледже, бу йылки эалини джедвельге алув тек аньаневий усулнен, яни малюматны эсапчылар тарафындан кягъыт анкеталарына язып алув шекилинде дегиль де, аньаневий янъы ракъамлы форматта да кечеджек.
Русие Федерациясынынъ башкъа сакинлери киби, къырымлылар да джедвельге мустакъиль суретте МФЦ-де я да «Госуслуги» порталы вастасынен алына билелер. Бунынъ ичюн электрон джедвельге алув вакътында https://www.gosuslugi.ru сайтында авторизациядан кечмек, «Пройти перепись населения» маддесини сечмек ве суаллерге джевап бермек керек.
Шуны да къайд этмели ки, электрон усулда тек озюнъизни дегиль, бир эвде сизнен берабер яшагъан дигер адамларны да джедвельге алдыра билесинъиз. Суаллерге джевап берген сонъ почтанъызгъа я да джеп телефонынъызгъа аиленъиз ичюн QR-код ве аиленинъ эр бир азасы ичюн ракъамлы код келип тюшеджек.
Джедвель алувнынъ бойле ракъамлы усулы малюмат топлав ве оны ишлевнинъ сурьатыны юксельтип къалмадан, кягъыт анкеталарыны толдурув вакътында япыла биледжек янълышларнынъ сайысыны эксильтмек имкяныны бере.
Бу эснада шуны эсапкъа алмалы ки, бутюн малюмат гражданнынъ айткъан шейлерине коре языла, яни ич бир тасдикълайыджы весикъа талап олунмайджакъ. Малюматны къайта ишлеп меркезлерине келип тюшкен информация исе шахснынъ ады косьтерильмеген алда сакъланыла. Бу малюматкъа бакъып, суаллер кимге берильгенини, умумен лаф ким акъкъында кеткенини бильмекнинъ чареси олмайджакъ. Эгер респондент тувгъан тиль сыфатында бир къач тильни косьтермеге истесе, эр бир тильнинъ адындан сонъ виргюль къоюлмалы. Миллетнинъ ве тильнинъ ады толусынен, къыскъартувларсыз язылмалы.
Бутюнрусие эалини джедвель алувнен багълы тафсилятлы информацияны https://www.strana2020.ru сайтындан алмакъ мумкюн.
«Янъы дюнья» №40(1630) 15.10.2021