Статья посвящена премьере спектакля в Крымскотатарском академическом театре.
Сентябрь 28-де Къырымтатар девлет академик музыкалы драма театри озюнинъ отуз экинджи театр мевсимини ачты. Бу сефер театрде италиялы драматурглар Джуллио Скарначчи ве Ренцо Тарабуззининъ «Меним зенаатым задекян» адлы пьесасы эсасында саналаштырылгъан спектакльнинъ премьерасы олды. Театримиз бу пьесаны тувгъан тилине терджиме этип, режиссёр Земине Алиева темашагъа къырымтатар аэнклерини къатмагъа тырышкъан.
Шубесиз, музыкалы комедиянынъ ады да гузель олгъаныны, спектакльнинъ афишасы да дикъкъат чекккенини эсапкъа алсакъ, къырымтатар сейирджисинде бу темашагъа меракъ догъаджагъы шубесиз эди. Эм, догърусыны айткъанда лирик чезилюви олгъан авантюралы, детектив сюжетли фарс комедиялары сейирджилер тарафындан эсериетте яхшы къаршылана. Чюнки адамлар театрге чокъча раатланып, турмуш меселелерини, куньделик мешакъатларны унутмакъ ичюн келелер.
Аслында бу комедия Русие театрлеринде, башкъа мемлекетлерде сыкъ къоюлгъаныны, сейирджилер оны бегенип бакъкъанларыны билемиз. Ве, ниает, мына, энди оны миллий театримизде тувгъан тилимизде сейир этмек имкянымыз олды. Биз де бу имкянны къачырмай, саналаштырмадан алгъан теэссуратларымыз иле окъуйыджыларымызнен пайлашмагъа истедик.
Адамларнен тиль тапышмагъа бильген, кенди джазибеси ве харизмасынен озюне чеккен баш къараман – Лютфий бей тойларда дюльбер-дюльбер къонушмалар япа ве деерлик эр сефер той софрасындан бир-эки лезетли шейлер сыпыштырып, сонъра оларны сата. Бойлеликнен баш къараман озь аилесини – апайы Эльмазны, къызы Феридени ве къыз къардашы Мединени бакъа. Амма бир кунь Лютфий кендисининъ адден тыш бир икътидарлыкълары олгъанынынъ фаркъына барып, эгер бу икътидарындан билип файдаланса, даа да буюк пара къазанып оладжагъыны анълай. Бойледже, бир хайрие вакъуфы тешкиль этип, ярдымгъа мухтадж олгъанлар сырасына озь аиле азаларыны кирсете. Апайы, къызы, къыз къардашы ве чингене къарт хайрие фондына пара берген зенгин ханымлар огюнде яландан хаста ве фукъаре олгъанларыны косьтерелер. Амма икяе девамында къараманлар арасында пейда олгъан пахыллыкъ, куньджюлик ве атта ки севги дуйгъусы яланнынъ ортагъа чыкъмасына себеп ола…
ДЕВАМЫ ГАЗЕТАДА
Весиле МЕНУСМАН
«Янъы дюнья» №39(1629) 8.10.2021