Статья посвящена творчеству художника Османа Бейтуллаева.
2018 сенеси учь агъа къардаш – Эдем, Осман ве Сулейман Бейтуллаевлер сюргюнлик къурбанларынынъ хатырасына багъышлап гузель бир видеолевха азырлагъан ве о левха бир къач кунь ичинде ичтимаий агъларда пек популяр олгъан эди.
Йигитлер видеолевханы чыкъармакъ ичюн Къырымнынъ чешит кошелеринде яшагъан къартларымызнен корюшип, оларнынъ сюргюнлик акъкъында икяелерини динъледилер. Джумледен, 14 яшында экенде Ватанындан сюргюн этильген Диляра битанынъ икяесини видеогъа кирсеттилер. Бундан гъайры видео девамында рессам Осман Бейтуллаев сюргюнлик мевзусында гузель ресимлер япты ки, бу ресимлер сув устюнде япылгъан эди. Онынъ къардашы – режиссер Эдем Бейтуллаев видео чыкъарды, эки догъмуш агъасы, чалгъыджы Сулейман Бейтуллаев исе видеонынъ сеси устюнде чалышты. Шимди де йигитлер иджатнен огърашып, меракълы лейхаларны омюрге кечирелер.
Бугунь сизни истидатлы агъа-къардашлардан бири — Осман Бейтуллаев иле таныш этмеге истеймиз. Истидатлы рессамнынъ ишлери пек чокъларны айретте къалдыра, озьлерине мефтюн эте.
Акъмесджитли Осман Бейтуллаев Къырым федераль университетининъ Къырымтатар ве шаркъ филологиясы факультетинде тюрк тили ве эдебияты болюгини битирди. Магистратурада окъугъан вакъытта мимарлыкъ зенатыны да менимседи.
Осман аман-аман эр бир иджаткяр киби иджатнен балалыгъындан мешгъуль. Онъа тасвирий санаткъа севгини бабасы ашлаткъан. «Фаэтон» этно-рок группасынынъ давулджысы, рессам Риза Бейтуллаев огълуна тасвирий санатнынъ ильк сырларыны ачкъан.
«Балалыгъымдан денъиз ве елькенли геминлерни тасвирлемекни севе, шунынъ ичюн оларнынъ ресимлерини чокъча япа эдим. Аслында эсасен Къырымнынъ тюрлю кошелерини тасвир этем.
Мен эки бучукъ йыл Тюркиеде яшадым. О вакъыт анда булунмам да иджадыма тесир этти. Ресимлеримде Тюркиенинъ гузель манзараларыны да тасвир эткен эдим», — дей рессам…
ДЕВАМЫ ГАЗЕТАДА
Весиле МЕНУСМАН
«Янъы дюнья» №38(1628) 1.10.2021