Статья посвящена выходу новой книги писательницы Айше Кокиевой.
Шимдики заманда языджыларнынъ иджадий фаалиет нетиджелери корюнмей, сеслери чыкъмай, деген фикирни сыкъ-сыкъ эшитмек мумкюн. Керчектен, языджыларнынъ эвельки итибары да, эвельки итибарлы языджылар да деерлик къалмады. Эдиплер де, гъариплер, озь ягъында къаврулалар. Амма къалемини эминликнен тутып, оны вира тепретип тургъан языджыларымыз да бар ве олардан бири Айше Кокиевадыр. Газетамызнынъ окъуйыджылары онынъ терен маналы макъалелерини, йылларнен топлап, азырлап берген фольклор материалларыны окъуйдырлар.
Бу куньлерде Айше Кокиеванынъ «Гонъюль ильхамы ве эмиринен» адлы китабы дюнья юзю корьди. И. Гаспринский адына медиамеркез тарафындан чыкъарылгъан янъы китапкъа муэллифнинъ эдебий, ахлякъий-этик ве ильмий-публицистик макъалелери кирсетильди.
Айше Кокиева чокъ йыллар девамында оджалыкъ япкъан эди. Шимди исе эм газета хадими, эм де КъМПУ ильмий-тедкъикъат институтынынъ мутехассысы ола. О, теджрибели муаллиме, ана ве бита оларакъ энъ муреккеп мевзуларны, маневий-ахлякъий меселелерни буюклерге де, кучюклерге де олдукъча анълайышлы этип тарифлей, эр анги мевзуны самимиетле анълата. Бунынънен берабер, олсун Исмаил Гаспринскийнинъ «Иван ве Сулейман» икяесини, олсун Шамиль Алядин ве Дженгиз Дагъджынынъ романларыны, олсун Сеитумер Эмин, Шакир Селим ве Джеваире Меджитованынъ шиирлерини, Урие Эдемова, Аблязиз Велиев ве Сабрие Сеутованынъ несирджилигини ве даа нидже эдиплернинъ иджадыны теренден талиль этип, оларны окъуйыджыгъа усталыкънен таныта.
Эльбет де, Айше Кокиева шаире ве терджиман оларакъ эдебий мевзуларда чокъ яза. Амма онынъ къалемге алгъан меселелерининъ озегинде даима тиль меселеси тура…
ДЕВАМЫ ГАЗЕТАДА
Сейран СУЛЕЙМАН
«Янъы дюнья» №38(1628) 1.10.2021