Статья посвящена юным талантам – участникам детского ансамбля «Янардагъ»
Тата-къардаш Айше ве Алим Джиляджи миллий оюнларымызны, сананы о къадар севелер ки, субетимиз башланмаздан эвель миллий урба кийип, гузель оюнларынен бизге хош дакъкъалар багъышладылар.
«Балалыгъымда миллий оюнлар ойнамакъ буюк хаялым эди. Лякин о заманда имкянлар олмагъаны себебинен хаялым ялынъыз хаял олып къалды. Лякин энди эки эвлядымны да санада корьмек манъа буюк севинч багъышлай. Олар арзуларымны керчеклештирди», – дей аналары Левиза ханым.
«Айше 2010 йылында догъды. Телевизоргъа бакъып, «Тым-тым» огренмеге башлады, оюнгъа буюк авеслиги уянды. Миллий балалар багъчасына къатнай эди. Анда ярышта иштирак этип, «Тым-тым» ойнап, Акъмесджит боюнджа биринджи ер къазанды. 4 яшында олгъанда Джемиле ханымнынъ ансамблине бердик. Джемиле ханым: «Эллери пек назик ве оюнгъа келише, къалдырмакъ керек», – деп бизни рухландырды. Айше сананы пек севе, авеслене. Келькенлерге эп оюнларыны багъышлай.
Алим исе 2012 йылында догъды. О да балалар багъчасына къатнап башлагъан сонъ «Чобан оюны» ойнап башлады. «Багъчамызда балалаларгъа шиир ве йырларны музыка оджамыз Ленара Якъубовна огрете эди. Ленара оджа, Алимнинъ эм «Чобан оюны», эм де «Къайтарма» яхшы ойнагъаныны корип, оны ансамбльге бермемизни тевсие этти. Шимди экиси де Зарема ве Энвер Эреджеповлар реберлигиндеки «Янардагъ» бала ансамблине къатнамакъталар. Зарема ханым да Джемиле ханымнынъ шегирти ола. Балалар Ялта, Алушта, Балыкълава, Кефе, Кезлев ве Акъмесджит шеэрлеринде бир сыра ярыш ве концертлерде иштирак этмектелер. Репертуарларында эсасен миллий оюнлар бар», – деп аналары анълата…
ДЕВАМЫ ГАЗЕТАДА
Серане КЕНДЖАЛИ
“Янъы дюнья” №37(1627) 24.09.2021