Статья посвящена творчеству известной крымскотатарской художницы Эдие Мустафаевой.
Ресим шиир кибидир. Онъа бакъып адам ялынъыз дюльберликтен хошланмай. Ресимде де шиирде олгъаны киби меджазлар ола. Оларнен рессам эсеринде белли бир девирни, я да белли бир меселени, бир фельсефени акс эттире. Рессам эсеринен сейирджисининъ дуйгъуларына тесир этип, белли бир адиселерге олгъан мунасебетини де косьтере. Бугунь сизни таныш этеджегимиз рессам Эдие Мустафаева ресимлеринде дюньягъа, адиселерге, оны эеджанландыргъан меселелерге мунасебетини косьтермеге тырыша. Рессамнынъ эсерлеринде Ватанымызнынъ дюльберлигини, халкъымызнынъ кечмишини, онынъ къуветини ве келеджекке олгъан умютини корьмек мумкюн.
Эдие Мустафаева 1984 сенеси Самаркъанд шеэринде муэндис-конструктор ве эмшире аилесинде дюньягъа келе. Балалыгъында Эдиенинъ эвлеринде эр вакъыт ренкли къалемлер, боя ве кягъытлар ола. Бундан гъайры къызчыкъ санатнен багълы китапларны саифелеп, белли рессамлар япкъан репродукцияларгъа мейиль берип осе.
Мектепте де Эдие Мустафаева оны рессамлыкъкъа джельп эткен адамны расткетире. Ресим оджасы къызгъа рессамлыкънынъ сырларыны ача ве къызда буюк къабилиет олгъаныны анълай. Эдие о вакъыт чешит ярыш ве сергилерде, атта халкъара ярышларда иштирак этип, гъалебе къазана.
2001 сенеси Эдие Мустафаева Къырымгъа, Акъмесджит районынынъ Мазанка коюне кочип келе. Ватангъа къайткъанынен яш рессамнынъ истидаты янъыдан ачыла. Тувгъан топракъларнынъ кучю, аджайип манзаралар къызнынъ ресимлеринде де акс олуна.
Эдие Ватанына кельген сонъ Къырым муэндислик-педагогика университетининъ амелий-манзаралы санат болюгине окъумагъа кире. Окъув девамында рессам чешит халкъара фестиваль ве лейхаларда иштирак эте. Онынъ ишлери тек Къырымда дегиль, юрт тышында да такъдим олуна. Бойлеликнен, рессам студентлик вакътында фааль чалышып, озь теджрибесини арттыра эм де яш иджаткярнынъ ишлерини энди чокъусы танып башлай. «Балалыгъымда меракълангъаным рессамлыкъ кет-кете мейиль берген эсас меслегиме чеврильди. Ресимлеримде фикир ве дуйгъуларым ренк, шекиль ве меджазлар вастасынен озь аксини тапа. Ватанымда иджат этмек — меним ичюн буюк бахттыр», — дей рессам…
Весиле МЕНУСМАН
ДЕВАМЫ ГАЗЕТАДА
«Янъы дюнья» №34(1624) 3.09.2021