Статья посвящена деятельности начальника отдела методического обеспечения и взаимодействия с общественными организациями ГБУ РК «Дом дружбы народов» Гульчер Зекерьяевой.
Энди къач йылдан берли чешит фестиваллерде, о я да бу иджадий ярышта даима назик, муляйим ве арекетчен бир къадынны расткетирем. О да, эксериетте, шу тедбирлернинъ тешкилятчыларындан бири ола. Таныш олунъыз — миллий медениетимизнинъ инкишафына мунасип иссесини къошкъан Гульчер Зекерьяева. Ал-азырда Гульчер ханым Акъмесджитте Халкълар достлугъы эвинде болюк мудири олып чалыша.
Гульчер Закир къызы Зекерьяева Къазахистанда, Джамбул виляетинде догъды. 1944 сенеси анасы Кефеден о ерге сюргюн олунып, бутюн аилесинден бир озю сагъ къалгъан эди. «1970-нджи сенелери биз анамызнен бабамнынъ янына — Озьбекистангъа авуштыкъ. 1991 сенеси исе Ватанымыз Къырымгъа авдет олдыкъ», — дей субетдешим.
Бу ерде Гульчер ханым Къырым медениет, санат ве туризм университетини эм де тарихчы-музейшынас ихтисасы боюнджа магистратураны аля ишаретлернен битире. 1996 сенеси исе омюримде муим бир денъишюв ола. О, «Къырым» фольклор ансамблинде чалышып башлай. «Мен не йырлайым, не де ойнайым. Амма къырымтатар йыр ве оюнларына севги дамарымда бар. Ансамбльде 18 йыл девамында идареджи-мудир олып чалыштым. Эбет, агъыр йыллар эди, огюмиздеки ёллар энишли-ёкъушлы олгъан. Лякин медениетимизни, музыка санатымызны сакълап къалув, джанландырув, инкишаф эттирюв ишине элимден кельгени къадар иссе къошкъаным иле фахрланам», — дей Гульчер ханым.
2015 сенеси субетдешим «Халкълар достлугъы эви» девлет бюджет муэссисесинде этномедений программалар ве джемаат тешкилятларынен багъ тутув болюгининъ мудири вазифесинде чалышып башлай. Эвеллери Къырымда бойле бир тешкилят олмагъаны ичюн Гульчер ханымгъа янъы вазифеде янъы чыгъырлар ачмагъа сырасы келе…
Сейран СУЛЕЙМАН
ДЕВАМЫ ГАЗЕТАДА
«Янъы дюнья» №31(1621)13.08.2021