В статье рассказывается о шахматном турнире среди любителей и профессионалов, который прошел в Бахчисарае.
Июль 10-да Багъчасарайда «Арслан» (реиси Инара Аблаева) медениет ве спорт генчлер тешкилятында «Bakhchisaray Chess Festival 2021» шахмат турнири кечирильди.
Ишбу турнирнинъ айрыджа эмиети бар. О, халкъара гроссмейстер Ава Сулейманованынъ тешеббюси ве ярдымынен, «Арслан»да тешкиль олунгъан шахмат курслары иштиракчилеринен бирликте отькерильди. Юксек севиеде кечкен турнирде эм балалар, эм буюклер, эписи олып 20 адам иштирак этти. Иштиракчилер турнирде белли гроссмейстер Ава Сулейманова булунгъанындан рухланып, оны корьгенлеринден пек мемнюн къалдылар. Ярышнынъ еди басамагъындан сонъ акем Владимир Жук нетиджелерни илян этти.
1-нджи ерни – Аким Мамедов (18 яшында)
2-нджи ерни – Длявер Сулейманов (86 яшында)
3-нджи ерни – Эдем Велиляев (23 яшында) къазандылар.
Гъалиплер диплом, кубок, медаль ве тортларнен такъдирлендилер. Бундан гъайры, 10 яшына къадар, 12 яшына къадар, 14 яшына къадар, 18 яшына къадар иштиракчилер эм де «эфендилер арасында энъ яхшы нетидже» ве «къызлар арасында энъ яхшы нетидже» боюнджа къошма мукяфатлар (диплом, медаль ве бахшышлар) да такъдим этильди. Къалгъан иштиракчилерге де эдие ве сувенирлер берильди.
Ава Сулейманова «Арслан» генчлер тешкилятына буюк шахмат тахтасы ве «Меним биринджи юрюшим» китабыны эдие этти. Ава Сулейманова бу китапны балаларгъа шахмат огретмек ичюн язды. Муэллиф шу китапны О. Акъчокъракълы адына къырымтатар шеэр кутюпханесине де (мудири Диляра Къурбанова) имзалап багъышлады.
Мезкюр турнир балалар ве буюклер арасында шахматны популярлаштырмакъ ишине буюк иссе къошты. О шахмат киби акълий спорт чешитини огренмек ичюн сильтем береджектир. Турнирде нагъышчылар ишлерининъ сергиси де нумайыш этильди. Ава ханымгъа бахшыш оларакъ нагъышлы фес (нагъышчы Арзы Акъмуллаева) такъдим этильди…
Диляра КЪУРБАНОВА
«Янъы дюнья» №27(1617) июль 16, 2021
Девамыны «Янъы дюнья»да окъунъыз