В статье рассказывается о взаимоотношениях девушек и парней, тема замужества и свадеб.
Къызларымыз къырымтатар йигитлеринде насыл чизгилерни корьмек истейлер?
Даа март айында чыкъкъан санларымызнынъ биринде «Къырымтатар къадын-къызларыны насыл инсалар оларакъ корьмек истер эдинъиз» деген макъале чыкъкъан эди. Бу макъалени язмакъ ичюн къырымтатар йигитлери арасында бир сорав кечирильген эди. Йигитлернинъ джевапларындан олар къырымтатар къадын-къызларымызнынъ иманы къавий олгъаныны, олар тербиели ве алчакъгонъюлли олгъанларыны, тувгъан тилимизни билип, урф-адетлеримизни кутькенлерини истегенлерини бильдик. Макъале басылгъан сонъ бир сыра окъуйыджыларымыз энди къызларымызнынъ къырымтатар йигитлери акъкъында не тюшюнгенлерини, оларда насыл чизгилерни корьмеге истегенлери акъкъында фикирлерини бильмемизни риджа эттилер. Иште, бу сефер де биринджи макъаледеки суаллерге бенъзер суаллерни къызларымызгъа берип, олар къырымтатар йигитлерини насыл инсанлар оларакъ корьмеге истегенлерини огрендик.
Къызларнынъ чокъусы ильк эвеля къырымтатар йигитлерини диянетли инсанлар оларакъ корьмек истей. «Биринджиден, мен къырымтатар йигитинининъ иманы къавий олгъаныны истейим. Асылында инсаннынъ иманы – буюк бир косьтергичтир. Инсаннынъ иманы къавий олса, о, Аллахтан къоркъса, яландан, зулумлыкъ япмакътан, ярамай шейлерден, мерхаметсизлик ве гунахтан къоркъар», – деди Зейнеб Ибраимова деген бир семетдешимиз. Алиме Менасова да иманы къавий олгъан йигит яхшы аилени къура биледжегине инана. «Йигитнинъ энъ муим чизгиси – мерхаметлик ве имандыр. Омюр бою яхшы арекетлер япкъан, ярамай сёз айтмагъан, «Аллах» сёзюни сыкъ-сыкъ хатырлагъан йигит озь къорантасына гузель орьнек олур. Мен янымда шойле бир инсанны корьмеге истейим», – дей къыз.
Йигитлернинъ джевапларындан да, оларнынъ да чокъусы ильк эвеля къызнынъ иманына дикъкъат айыргъанларыны корьген эдик. Бугунь яшларымызнынъ чокъусы динимизни терендже огренип, Аллахнынъ эмирлерини ерине кетирмеге тырыша ве иманы къавий олгъан бири иле аиле къурып, диянетли эвлятлар осьтюрмеге ниет эте.
Йигит келеджекте аиле башы ола ве омюр аркъадашы, балалары ичюн месулиет ташый. Соравда иштирак эткен къызларнынъ йигитлеримизде корьмеге истеген чизгилери боюнджа бир статистика кечирсе эдик, экинджи ерге айны месулиетлик чизгисини къоймакъ мумкюн олур эди.
Алиме Менасова эвельден къырымтатар йигитлери месулиетли ве акъыллы олгъанларыны айта ве бугунь де оларнынъ айны шойле месулиетли, кучьлю ве озь сёзюне саип олгъанларыны истей. «Эвельден йигитлер яшайышта озь вазифелерини яхшы анълай эдилер, чюнки агъыр вакъытларда осьмюр огъланлар къорантаны бакъмакъ вазифесини озь омузларына ала эдилер. Дженк, сюргюнлик бунъа мисальдир… бугунь де бизим йигитлеримиз айны месулиетли, мустакъиль, кучьлю олып, берген сёзлерини тутмакъ кереклер», – бильдире Алиме.
Къызлар йигитлеримизнинъ месулиетли олмаларындан гъайры эмексевер олгъанларыны истейлер. Зейнеб Ибраимова къадыннынъ ве балаларнынъ темин этильмеси, къоранта башынынъ, яни йигитнинъ боюн-борджудыр, деп сая. «Йигитнинъ аилеси – онынъ эманетидир, онынъ месулиетлигиндедир. Шунынъ ичюн о, ишсевер олмакъ керек. Пара къазанмакъ керек. Шимди къадынлар да пара къазана, амма эсасен бу йигитлернинъ вазифесидир», – деп озь фикрини бильдире Зейнеб…
Весиле МЕНУСМАН
«Янъы дюнья» №26(1616) июль 9, 2021
Девамыны «Янъы дюнья»да окъунъыз