Статья посвящена оперной певице, заслуженной артистке Крыма Арзы Меджитовой.
Якъында газетамызнынъ саифесинден Къырым девлет филармониясы Ялта болюгининъ вокалджы артисти Арзы Меджитовагъа «Къырым джумхуриетинде нам къазангъан артист» унваны берильгенини хабер этип, оны хайырлагъан эдик. Бугунь исе окъуйыджыларымызны истидатлы вокалджынен даа да якъынджа таныш этмек истедик.
Арзы Меджитова меццо-сопрано сесининъ саибидир. Дюльбер, шырныкълы ве джазибели бу сес сийрек сеслерден сайыла. Бойле сеси олгъан адамлар эм опера эсерлерини, эм дигер эсерлерни гузель шекильде иджра эте билелер.
Арзы Меджитова Озьбекистанда, Ташкент виляетининъ Ташморе (Туябугъаз) къасабасында догъгъан. Къырымгъа келип, музыка мектебини битирген сонъ, Ялта музыка педагогик колледжине окъумагъа кирген. Бу ерде яш йырджынынъ надир сесини бир оджасы эшитип, оны музыка алемине чомдыра, эминлик дуйгъусы багъышлай ве къолтута. «Экинджи курста окъугъанда Алла Спиридонованен таныш олдым. О, меним дюньябакъышымны бутюнлей денъиштирди, меним гузель сес тембрим ве кенъ диапазоным олгъанына ишандыра бильди. Вокал боюнджа меним ильк оджам, меним джетемен йылдызым олды. Мен окъувны битирген сонъ о, манъа Одесса консерваториясынынъ вокал болюгине кирмекни тевсие этти. Ичимде эминлик уяндырмакъ ичюн фортепиано ве симфоник оркестр зилинде концертлер тешкиль эте эди. Манъа озюме ишанмагъа ярдым эткени ичюн, онъа миннетдарым», — тариф эте вокалджы.
1995 сенеси Арзы Меджитова оджасынынъ тевсиесинен Одесса девлет музыка академиясына окъумагъа кире. Бу ерде де вокалджынынъ ёлунда гузель оджалар расткеле. Олардан бири – Украинада нам къазангъан артист ве оджа, профессор Александра Фоменко олды.
Вокалджы окъув девамында чешит халкъара ярыш ве фестиваллерде иштирак этип, гастроллерге чыкъа эди. 1998 сенеси йырджы Чехияда А. Дворжак адына халкъара ярышында лаурет унваныны къазана. Бундан гъайры Одесса, Киев, Ялта, Оулу (Финляндия), Трнава (Словакия), Бейрут (Ливан) киби шеэрлерде, симфоник оркестрнинъ эшлигинде чыкъышта булуна. Опера йырджысынынъ надир сесини эшиткен санатчылар оны атта Прага опера театри ве Финляндияда опера театрине давет этелер. Лякин йырджы озь фаалиетини Одесса опера театринде девам эттирмек къарарында тура.
Окъув вакътында вокалджы классик, четэль, рус музыкасынынъ инджеликлеринен таныш олып, озь теджрибесини арттырды. Вокалджынынъ аджайип сесине мефтюн олып, оны чешит буюк тедбирлерге давет эте эдилер. «2001 сенеси Украина, Русие, Азербайджан ве Къазахистан девлетлерининъ ёлбашчылары Ялтада корюшкен эдилер. Бу корюшюв мунасебетинен отькерильегн тедбирде чыкъышта булунгъан эдим. Айны йылы Украина ве Тюркиенинъ ишбирлигине он йыл толгъаны мунасебети иле кечирильген концертте йырладым. О ерде бутюн девлетлернинъ векиллери булунгъан эди», — айта Арзы Меджитова…
Весиле МЕНУСМАН
«Янъы дюнья» №25(1615) июль 2, 2021
Девамыны “Янъы дюнья”да окъунъыз