В статье рассказывается о легендарном чемпионе Олимпийских игр Рустеме Казкове.
Кеченде Ф. Якъубов адына Къырым муэндислик-педагогика университетинде «Рустем Казаков: Биринджи олмакъ» весикъалы-бедиий фильмининъ премьерасы олып кечти. 49 йыл огюне Рустем Казаков Мюнхенде юнан-рома курешинде къырымтатарлар арасында ильк олимпия чемпионы олып, тарихкъа адыны алтын арифлернен яздырды. Фильм «Миллет» телеканалы тарафындан чыкъарылды. Фильмнинъ муэллифи Эльвина Меметова, режиссёры Виктор Лопата, операторлары Асан Ибраимов ве Эрвин Эмиралиевдир. Чекимлер садедже Къырымда дегиль де, Озьбекистанда, Москвада ве Геленджикте олып кечти. Рустем агъа Казаковнынъ устазлары, къорантасы, достлары ве шегиртлеринен субетлешип, бу намлы спортчынынъ аяты ве гъалебеси акъкъында икяе этильди. Эм де спорткъа, курешке меракъ дуйгъан яш ве авескяр генчлер ичюн буюк орьнек олгъан бу шахсиет акъкъында гъает муим бир эсер нумайыш этильди.
Фильмнинъ премьерасына Рустем Казаков ве къорантасы тешриф буюрдылар. Кельгенлер арасында Къырым джумхуриети спорт куреш федерациясынынъ темсильджилери, Къырымнынъ белли курешчилери программаны яраштырдылар. Олар мезкюр фильм юнан-рома курешини популярлаштырмакъ ичюн буюк эмиет ташыгъаныны къайд эттилер. Рустем Казаковнынъ энъ буюк арзусы исе Къырымда бир дегиль, бир чокъ олимпия чемпионлары етиштирмектир…
Серане КЕНДЖАЛИ
Девамыны «Янъы дюнья»да окъунъыз
«Янъы дюнья» №24(1614) июнь 25