В статье рассказывается о крымском спортсмене Энвере Меметове и его победах.
Миллетимизни дюньягъа таныткъан адамлар сырасында спортчыларымыз да айры ер туталар. Шойле инсанлардан бири – таш котерюв боюнджа намлы спортчы Энвер Меметовдыр. Бу йыл майыс 28-30 куньлери Къазан шеэринде олып кечкен Авропа чемпионатында ватандашымыз докъсан беш килодан юкъары чеки категориясында кумюш медаль къазанды.
Мезкюр ярышкъа он беш улькени темсиль эткен учь юз спортчы къатылды. Семетдешимиз энъ кучьлю пельванлар арасында чыкъышта булунаракъ, ташны он дакъкъа ичинде докъсан кере котерип тюшюрген. Майыс айынынъ башында исе спортчы таш котерюв боюнджа Дюнья кубынынъ экинджи баскъычында иштирак этип, алтын медаль къазанды.
Энвер Меметовнынъ эдждатлары курешчилер олгъанлар. Яни, о, балалыгъындан бу саагъа меракъ беслеген. Асылында спорттаки ильк адымларыны бокстан башлагъан. Лякин экимлер йигитке бокснен мешгъуль олмакъны ясакъ эткенлери ичюн Энвер таш колтерюв спортына авушкъан.
О, он секиз яшыны толдурып, ильк сефер ярышкъа къатылгъанда отуз эки килолыкъ ташны элли кере котерип, ярышнынъ гъалиби олгъан. Иште, шундан сонъ бу спортта эппейи буюк нетиджелерге ирише биледжегини анълап, озь кучьлерини джумхуриет ве ульке севиесинде денъемеге истеген. Бундан онъа устазы Къырым таш котерюв спорты федерациясынынъ президенти Энвер Эмирасанов олгъан.
Эльбет, эр бир джиддий спортчы киби, Энвер де даима ярышларда гъалебе къазанмагъа истей эди ве буюк гъайрет косьтерип, эр кунь мешкъ этип къойгъан макъсадларына адым-адым якъынлашты. Эм кучюни, эм теджрибесини арттырып, башта спорт устасы олды, 2020 сенеси исе Санкт-Петербургда отькерильген халкъара чемпионатта экинджи ерини къазанып, халкъара класста спорт устасы унванына наиль олды..
Спортчынынъ тек кучю дегиль, гъайрети де пек чокъ адамны керчектен айретлендире. Энвернинъ айткъанына коре, онъа юксек нетиджелерге иришмеге айны ирадеси, гъайрети ве Къырымда энъ кучьлю спортчы олмакъ истеги ярдым эте экен…
Весиле МЕНУСМАН
Девамыны «Янъы дюнья»да окъунъыз
«Янъы дюнья» №22(1612) июнь 11, 2021