Статья освящает деятельность ансамбля «Мелевше»
Балачыкъларда миллий шуурнынъ инкишаф эттирильмеси, оларгъа ватанперверлик дуйгъусынынъ ашланмасы тек аиле ве миллий мектеплерде дегиль де, Къырымнынъ чешит шеэрлеринде арекет эткен ве яш несильни зенгин медениетимизнен таныш эткен ансамбллерде де кечириле биле. Бойле ансамбллерден бири Судакъ шеэриндеки «Мевлевше»дир.
Былтыр бу ансамбль озюнинъ он йыллыгъыны къайд этти. Онынъ ребери Лютфие Чабанова ве шегиртлери юбилейге багъышлап буюк тедбир азырлагъан эдилер, лякин пандемия юзюнден концертни тек бу йылнынъ майыс 23-де кечирип олдылар.
Лютфие Чабанова севимли ишине бутюн къальбинен берильген. Он йыл эвельси Медениет эвинде он эки бала ичюн къырымтатар миллий оюнлары тёгерегини ачкъан къадын бугунь юзге якъын балачыкъны топлап, оларнен бераберликте медениетимизни дигер халкъларгъа таныта.
– Биз энъ эвеля къырымтатар оюнларымызгъа мейиль берип, медениетимизнинъ инкишафы огърунда чалышамыз. Чюнки шегиртлеримнинъ докъсан файызы къырымтатар балаларыдыр. Амма бизим оюнларымыздан гъайры биз рус, украин, озьбек ве атта къытай оюнларыны да ойнаймыз, — дей Лютфие Чабанова.
Лютфие Чабанова шегиртлерини чешит ярышларгъа азырлап, оларнынъ башкъа истидатлы балачыкъларгъа бакъмагъа ве озьлерини косьтермеге фурсатлары олгъаныны истей. Онынъ фикирине коре, ярышлар балаларгъа сильтем бере ве усталыкъларыны арттырмагъа ярдым эте.
Ансамбль тек Къырымдаки ярыш ве фестиваллерде дегиль, халкъара ярышларда да иштирак эте. Меселя, кечкен сене пандемиягъа бакъмадан, ансамбль семерели чалышып, чешит ярыш ве фестиваллернинъ гъалиби олгъан.
Лютфие Чабанова «Мелевше» ансамблининъ меракълы бир аньанеси акъкъында сёйледи. Ансамбль бир де-бир шеэрге барса, о шеэрнинъ энъ мешур ве итибаргъа ляйыкъ еринде мытлакъа «Багъчасарай къайтармасы»ны ойнай экен.
– Былтыр орта группамнен Пятигорск шеэринде олып кечкен ярышта иштирак этип, биринджи ерни алдыкъ. Экскурсия вакътында Эльбрус дагъына, 3,5 бинъ метр юксекликке котерилип, бузлукъ устюнде «Багъчасарай къайтармасы»на ойнадыкъ. Мен беллесем, биз Эльбруста къырымтатар къайтармасына ойнагъанлардан биринджи олгъандырмыз, – деди Лютфие Чабанова…
Весиле МЕНУСМАН
«Янъы дюнья», №21(1611), июнь 4, 2021
Девамыны «Янъы дюнья»да окъунъыз