Статья освящает празднование юбилея поэта Сеитумера Эмина в Крымском инженерно-педагогическом университете.
Шаир, языджы, Улу Ватан дженки ве миллий арекет ветераны, Украинада нам къазангъан санат эрбабы Сеитумер Эминнинъ 100 йылыгъына багъышлангъан тедбирлер девам эте. Майыс 21-де КъМПУнинъ Ильмий-тедкъикъат институтында «Сеитумер Эмин – дженкявер языджы ве шаир» мевзусында «тёгерек маса» отькерильди.
Тедбирде филология илимлери докторы, профессор, мезкюр институтнынъ директоры Исмаил Керим, «Эдип» къырымтатар языджылары бирлигининъ реиси Урие Эдемова, «Намус» тешкиляты реисининъ муавини Дильшад Ильясов, языджы ве шаир Аблязиз Велиев, миллий арекет иштиракчилери Гомер Баев, Певат Зети, Асан Хуршутов, Рефат Годженов, Васви Абдураимов, эдипнинъ аркъадашы Решат Ахтемов ве дигерлер Сеитумер Эмин гъает истидатлы шаир, садыкъ дост, миллетпервер инсан олгъаныны айтып, онынъ аяты ве фаалиетинен багълы базы хатырлавларынен пайлаштылар. Сеитумер Эмин миллий арекетте иштирак эткени ичюн дефаларджа зулумларгъа огъраса да, сонъуна къадар куреш ёлундан таймагъаныны ургъуладылар. «Тёгерек маса»да И. Гаспринский адына медиамеркез тарафындан чыкъарылгъан «С. Эмин. Меним ёлларым» китабы да такъдим олунды. Мезкюр китапкъа шаирнинъ назм эсерлери кисретильди. Тедбирнинъ иштиракчилери языджынынъ несрий ве публицистик эсерлерини де нешир этмек къарарына кельдилер.
Эдипнинъ огълу Албат Эминов ве къызы Бингуль Эминова бабаларыны унутмагъанлары ичюн эр кеске тешеккюрлер бильдирдилер. Албат Эминов бабасынынъ даа ич бир ерде басылмагъан фоторесимлерини косьтерди.
Тедбирни ильмий-тедкъикъат институтынынъ терджиманлары Къубедин Салядинов ве Сервер Бекиров тешкиль эттилер.
Озь мухбиримиз
«Янъы дюнья» №20 (1610) 28.05.2021