Статья посвящена творчеству молодого и талантливого дизайнера Заремы Эмиросмановой.
Дюньянынъ бутюн яшлары киби, бизим земаневий яшлар да мот кийинмеге тырышалар. Янъы чыкъкъан урба моделлерини корип, озьлерине де шойле шейлер алмагъа истейлер. Эм къуванчлы ери шунда ки, яшлар арасында тек мот кийинмеге дегиль де, образларында миллий аэнклерни косьтермеге истегенлер де бар. Бунда яшларымызгъа дизайнер Зарема Эмиросманова ярдым эте биле.
Джанкойде яшагъан дизайнер миллий услюпте урба тикмектен гъайры, земаневий кийимлерге миллий унсурларны, меселя фес, къасиде, къушакъ, енъкъапакъ къоша. Бундан гъайры Зареманынъ ишлери арасында гузельден-гузель Къуран къаплар ве намазлыкълар, миллий орьнеклернен нагъышлангъан чанта, клатч, ястыкълар ве паннолар бар.
Зареманынъ ана-бабасы амелий санаткъа севгини къызларына балалыгъындан ашлагъанлар. Къыз вакъыт таптымы, мытлакъа бир шейлер ишлемеге севген. Ве зенаат сечмек вакъты кельгенинде, озюни чешит зенаатларда корьсе де, кене де аятыны иджатнен багъламакъ къарарына кельген.
2014 сенеси Зарема Эмиросманова Къырым муэндислик-педагогика университетининъ «Енгиль санайы маллары технологиясы болюгини битирип, тувгъан шеэринде, озю бир вакъытларда окъугъан мектебинде дигер балачыкъларгъа тасвирий санатнынъ сырларыны ачкъан. Лякин 2018 сенеден башлап, дизайнер шахсий иджадий фаалиетини алып бармакъ къарарына келип, озь устаханесинде чалышып башлагъан.
Зарема аман-аман эр бир ишинде миллий орьнеклеримизни тасвир эте. Дизайнер озь иджады айны миллий орьнеклеримизден башлангъаныны ве ильк сефер орьнеклеримизнен университетте танышкъаныны айта. «Тикильген эшьяларны моделлев, конструкциялав ве оларнынъ технологиясы» кафедрасында студентлер ичюн «СеЛяМ» деген мода лабораториясы чалыша. Лабораториянынъ эсас вазифеси — земаневий урбанынъ дизайнына къырымтатар орьнеклерини къошмакътыр. Бу мевзу Зареманынъ язгъан ильмий-тедкъикъий ишинде де ачыкълана. О, миллий услюпте яратылгъан урбалар мисалинде дизайн лейхалары ве урбаны 3D шекилинде моделлештирюв боюнджа бильгилерини арттыргъан. Джумледен, тикиш машинасынен нагъышлав ёнелишинен меракъланып башлагъан. Бугунь бу – дизайнернинъ эсас ёнелишидир ве о шу ёнелиште теджрибесини ве бильгилерини даима арттырмагъа тырыша. Лякин машина нагъышындан гъайры Зарема озю, интуитив севиеде нагъышлавнынъ чешит техникаларыны да менимсеген…
Весиле МЕНУСМАН
«Янъы дюнья», №19 (1609) 21.05.2021
Девамыны «Янъы дюнья»да окъунъыз