Статья «Аким Джемилевнинъ арзусы керчеклешти» посвящена деятельности ансамбля «Атеш» и его новому проекту.
Эр бир миллетнинъ тиль, эдебият, санат ве медениет киби дегерликлери бар. Олар асырлар девамында инкишаф этип келе, зенгинлеше. Биз миллет оларакъ бутюн бу байлыкъларгъа саипмиз. Бу мирас несильден несильге кечип, янъы истидатларны, янъы исимлерни тарих санасына чыкъара. Бугуньки субетдешим генч, истидатлы, ана тилинде гузель къонушкъан, энъ эсасы озь миллетининъ тарихий къараман шахысларыны таныгъан ве урьмет эткен, оларны яш несиллерге танытмакъ ичюн земаневий имкянлардан файдаланып, элинден кельгени къадар еткизмеге чалышкъан балетмейстер, «Атеш» ансамблининъ эсасчысы, мешур балетмейстер Аким Джемилевнинъ бирден 40 чифтке «Къайтарма» ойнатмакъ гъаесини керчеклештирген Мидат бей Халиловдыр.
– 6 яшында экенде анам-бабам мени оюн тёгерегине бердилер, – дей Мидат бей. – Мектепни битиргендже миллий оюнларгъа, гимнастикагъа, спорт оюнларына къатнадым. Мектепни битирген сонъ шек-шубесиз оюнджы олмакъ истедим. Весикъаларымны Къырым медениет, санат ве туризм университетине бердим ве бирден Къырымтатар миллий театрине балет артисти оларакъ ишке кирдим. Театрде 12 йыл чалыштым. Сонъра Эльдар Джелиловнен берабер «Атеш» дуэтини къурдыкъ ве тойларда ойнадыкъ. Бир чокъ ана-бабалар дерслер береджекмизми, деп сорап башладылар. Акробатик оюнлар ойнагъанымыз, сальто ве иляхре арекетлер япкъанымыз ичюн баягъы рагъбет къазандыкъ. Иште, нетиджеде, балалар джедвелини азырламагъа башладым, эки бала, учь бала дегенде, бала сайысы 25-ке барды ве мен кирагъа зал алып, 2016 сенеси сентябрь 3-те ишимни башладым. Даа эвель Эльдарнен «Атеш» дуэтимиз олгъаны ичюн, ансамбльге шу адны бердим. Санадаки чыкъышымызны бегенип, янъы балалар къошулмагъа башлады. Якъында сайымыз 60-къа барды. 2017 сенеси ачыкъ концерт бердик. Ансамбльде эсасен 4 яшындан 30 яшына къадар яш категориялары мевджуттыр. Бундан да гъайры даа чешит яштаки талебелеримиз де бар. Базылары санагъа чыкъмакъ ичюн дегиль де, озьлери ичюн огренмек истейлер. Тойлар, дигер мерасимлер ичюн азырланмакъ киби ниетлери бар, бу себеп иле махсус дерслер алмакъ ичюн бизге мураджаат этелер. Бу группаларда яшлар да бар, 18 яшында да бар, 60 яшыны кечкенлер де бар. Бу йыл беш яшыны толдураджакъ «Атеш» ансамбли къыскъа муддет ичинде халкъара дереджеде бир сыра гъалебе, диплом ве кубоклар эльде этти. Бу гъалебелер учь йыл ичинде къазангъанларымыз. Бундан да гъайры видео дерслерини де чекип башладым…
Серане КЕНДЖАЛИ
Девамыны «Янъы дюнья»да окъунъыз